ന്യൂദല്‍ഹി: ശ്രീലങ്കയിലും ബംഗ്ലാദേശിലും നേപ്പാളിലും സര്‍ക്കാരുകള്‍ അട്ടിമറിക്കപ്പെട്ടത് ഭരണം ദുര്‍ബലമായത് മൂലമാണെന്ന് ദേശീയ സുരക്ഷാ ഉപദേഷ്ടാവ് അജിത് ഡോവല്‍. ശക്തമായ ഭരണസംവിധാനങ്ങള്‍ ഉള്ള രാജ്യങ്ങളില്‍ ഭരണത്തെ അട്ടിമറിക്കാന്‍ സാധിക്കില്ലെന്നും അജിത് ഡോവല്‍ പറഞ്ഞു. സര്‍ദാര്‍ വല്ലഭായ് പട്ടേലിന്റെ 150ാം ജന്മദിന ആഘോഷത്തിന്റെ ഭാഗമായി ഭരണനിര്‍വ്വണം എന്ന വിഷയത്തെക്കുറിച്ച് സര്‍ദാര്‍ പട്ടേല്‍ പ്രഭാഷണം നടത്തുകയായിരുന്നു അജിത് ഡോവല്‍.
സര്‍ദാര്‍ വല്ലഭായ് പട്ടേലിന്റെ രാഷ്‌ട്രനിര്‍മ്മാണമൂല്യങ്ങളില്‍ നിന്നും പ്രചോദനം ഉള്‍ക്കൊള്ളണമെന്ന് അജിത് ഡോവല്‍. അതിനൊപ്പം അതിവേഗം മാറിക്കൊണ്ടിരിക്കുന്ന ലോകത്തെ പുതിയ വെല്ലുവിളികള്‍ക്കൊപ്പം നമ്മള്‍ മാറുകയും ചെയ്യണമെന്നും അജിത് ഡോവല്‍ പറഞ്ഞു.
സര്‍ദാര്‍ വല്ലഭായ് പട്ടേലിനെ നമ്മള്‍ ഒന്നുകൂടി കണ്ടെത്താന്‍ ശ്രമിക്കേണ്ടതുണ്ട്. എങ്കിലേ അദ്ദേഹത്തിന്റെ ചിന്താപ്രക്രിയയെ നമുക്ക് അനുഗമിക്കാന്‍ സാധിക്കൂ.- അജിത് ഡോവല്‍ ചൂണ്ടിക്കാട്ടി. ലോകം വലിയ മാറ്റങ്ങിലൂടെ കടന്നുപോവുകയാണ്. ഈ പൊടിയിലും കൊടുങ്കാറ്റിലും പെട്ട് നമ്മള്‍ അന്ധരായിക്കൂടാ. തന്റെ ജീവിതം മുഴുവന്‍ ഒരു സംസ്കാരത്തെ രാഷ്‌ട്രമാക്കി മാറ്റാന്‍ ശ്രമിച്ച സര്‍ദാര്‍ വല്ലഭായ് പട്ടേലിനെപ്പോലെ നമ്മളും തയ്യാറെടുക്കേണ്ടതുണ്ട്. – അജിത് ഡോവല്‍ പറയുന്നു.
അമൂര്‍ത്തമായ ആശയങ്ങളിലല്ല ഒരു രാഷ്‌ട്രത്തിന്റെ കരുത്ത് ഇരിക്കുന്നത്. അവിടുത്തെ സര്‍ക്കാരിലും അതിന്റെ ഭരണസംവിധാനത്തിലൂമാണ്. രാജ്യത്ത് ഏകത വളര്‍ത്താന്‍ നമ്മള്‍ പരിശ്രമിക്കുമ്പോള്‍ മറ്റ് ചില ശക്തികള്‍ രാജ്യത്തെ വിഭജിക്കാന്‍ ശ്രമിച്ചുകൊണ്ടേയിരിക്കും. രാജ്യത്തെ ഒന്നിപ്പിക്കുകയല്ല ഇവരുടെ ലക്ഷ്യം, പകരം അങ്ങേയറ്റം രാജ്യത്തെ പല കഷണങ്ങളാക്കി ചിതറിക്കലാണ്. – അജിത് ഡോവല്‍ ചൂണ്ടിക്കാട്ടുന്നു.
ജനങ്ങള്‍ക്ക് സുരക്ഷ നല്‍കണം. അതാണ് ഒരു സര്‍ക്കാരിന്റെ പ്രാഥമിക കര്‍ത്തവ്യം. – അജിത് ഡോവല്‍ പറയുന്നു.
