പട്ന: ബീഹാറിന്റെ സമഗ്രവികസനമാണ് എന്‍ഡിഎയുടെ ലക്ഷ്യമെന്ന് കേന്ദ്ര പ്രതിരോധ മന്ത്രി രാജ്നാഥ് സിങ്. വിവിധ തെരഞ്ഞെടുപ്പ് റാലികളില്‍ സംസാരിക്കുകയായിരുന്നു അദ്ദേഹം. തെരഞ്ഞെടുപ്പില്‍ ഒരുഭാഗത്ത് വികസിത ഭാരതത്തിന്റെയും വികസനത്തിന്റെയും പാതയാണ്. എതിര്‍ഭാഗത്ത് ജംഗിള്‍ രാജാണ്. ബീഹാര്‍ വികസനത്തിന്റെ പാത തെരഞ്ഞെടുക്കും. എന്‍ഡിഎ വീണ്ടും വന്‍ ഭൂരിപക്ഷത്തോടെ സര്‍ക്കാര്‍ രൂപീകരിക്കുമെന്നും അദ്ദേഹം പറഞ്ഞു.
ബിജെപിയും എന്‍ഡിഎയും സത്യസന്ധത, സേവനം,
വികസനം എന്നിവയുടെ രാഷ്‌ട്രീയം പിന്തുടര്‍ന്നപ്പോള്‍, ആര്‍ജെഡി അഴിമതിയും കുറ്റകൃത്യങ്ങളും കൊണ്ട് ബീഹാറിന്റെ പ്രതിച്ഛായില്‍ മങ്ങലേല്‍പ്പിച്ചു. ബീഹാറിനെ ജംഗിള്‍രാജിലേക്ക് മടക്കിക്കൊണ്ടുപോകാന്‍ അനുവദിക്കില്ല. പ്രധാനമന്ത്രി നരേന്ദ്ര മോദിയുടെ വികസിതഭാരതം എന്ന ലക്ഷ്യം ബീഹാര്‍ ‘വികസിത ബീഹാര്‍’ ആയാല്‍ മാത്രമേ യാഥാര്‍ത്ഥ്യമാകൂ. മോദിയുടെയും നിതീഷ് കുമാറിന്റെയും നേതൃത്വത്തില്‍ മാത്രമേ ഇത് സാധ്യമാകൂ.
കോണ്‍ഗ്രസ്- ആര്‍ജെഡി നേതൃത്വത്തിലുള്ള യുപിഎ സര്‍ക്കാരിന്റെ 10 വര്‍ഷത്തിനിടയില്‍, ബീഹാറിന് വികസനത്തിനായി വെറും രണ്ട് ലക്ഷം കോടി രൂപ മാത്രമാണ് നല്‍കിയത്, എന്നാല്‍ നരേന്ദ്രമോദിയുടെ നേതൃത്വത്തിലുള്ള എന്‍ഡിഎ സര്‍ക്കാര്‍ 11 വര്‍ഷത്തിനുള്ളില്‍ ബീഹാറിന് 15 ലക്ഷം കോടിയിലധികം രൂപ നല്‍കി.
റോഡുകള്‍ മുതല്‍ വിദ്യാഭ്യാസം വരെയും വൈദ്യുതി മുതല്‍ ആരോഗ്യ സംരക്ഷണം വരെയും ക്രമസമാധാനം മുതല്‍ നിക്ഷേപം വരെയും ബീഹാര്‍ ഇന്ന് കൈവരിച്ച പുരോഗതി എന്‍ഡിഎ സര്‍ക്കാരിന്റെ കഠിനാധ്വാനത്തിന്റെയും പ്രതിബദ്ധതയുടെയും ഫലമാണ്. ഒരുകാലത്ത് പിന്നാക്കാവസ്ഥയുടെ പ്രതീകമായി കണക്കാക്കപ്പെട്ടിരുന്ന ബീഹാര്‍ ഇപ്പോള്‍ മുഴുവന്‍ രാജ്യത്തിനും വികസനത്തിന്റെ വേഗത നിര്‍ണയിക്കുന്നു. ഇന്ന്, ബീഹാറിന്റെ ജിഡിപി വളര്‍ച്ചാ നിരക്ക് 14% ആണ്, രാജ്യത്തെ രണ്ടാമത്തെ ഉയര്‍ന്ന നിരക്കാണിത്.
ബീഹാറിന്റെ മൊത്തം ബജറ്റ് ഏകദേശം 3.25 ലക്ഷം കോടിയാണ്. തേജസ്വി യാദവ് പറയുന്നപോലെ സംസ്ഥാനത്തെ ഒരു കുടുംബത്തിലെ ഒരാള്‍ക്ക് എന്ന രീതിയില്‍ സര്‍ക്കാര്‍ ജോലി നല്‍കിയാല്‍ ശമ്പളം നല്‍കാന്‍ മാത്രം 12 ലക്ഷം കോടി രൂപ വേണ്ടിവരും. ഈ പണം എവിടെ നിന്ന് കണ്ടെത്തുമെന്നാണ് തേജസ്വി യാദവ് പറയുന്നത്. തേജസ്വി യാദവും രാഹുല്‍ ഗാന്ധിയും നുണകള്‍ പ്രചരിപ്പിച്ച് രാഷ്‌ട്രീയം കളിക്കുകയാണെന്നും ഇത് അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
