ആലപ്പുഴ: ദേവസ്വം ബോര്ഡുകള് പിരിച്ചുവിടണമെന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് എസ്എന്ഡിപി യോഗം മുഖപത്രമായ യോഗനാദത്തില് എഴുതിയ എഡിറ്റോറിയലില് ആവശ്യപ്പെട്ടു. അഞ്ച് ദേവസ്വം ബോര്ഡുകളും അഴിമതിയിലും കൊള്ളയിലും മുങ്ങിയെന്നും ശബരിമല സ്വര്ണക്കൊള്ള സര്ക്കാരിനെയും ദേവസ്വം ബോര്ഡിനെയും പ്രതിസന്ധിയിലാക്കിയെന്നും എഡിറ്റോറിയലില് പറയുന്നു.
രാഷ്ട്രീയ പുറമ്പോക്കില് ഗതികിട്ടാപ്രേതങ്ങളായി അലയുന്ന നിര്ഗുണന്മാരായ നേതാക്കള്ക്ക് പദവിയും ജീവിക്കാന് വകയുമുണ്ടാക്കുന്ന സംവിധാനമായി ദേവസ്വം ബോര്ഡുകള് മാറി. വന്നവരിലും പോയവരിലും ചൂഷണവും മോഷണവും നടത്താത്തവര് കുറവാണ്. കാണിക്കവഞ്ചിയില് കൈയിട്ടുവാരാത്തവരും ചുരുക്കം.
ഹൈക്കോടതിയുടെ ഇടപെടല് ഒന്നുകൊണ്ടുമാത്രമാണ് തിരുവിതാംകൂര് ദേവസ്വം ബോര്ഡും മറ്റ് ദേവസ്വം ബോര്ഡുകളും ഇതുപോലെയെങ്കിലും പ്രവര്ത്തിക്കുന്നത്. അല്ലായിരുന്നുവെങ്കില് പ്രതിഷ്ഠ വരെ അടിച്ചുകൊണ്ടുപോകാന് കഴിയുന്ന മുരാരി ബാബുമാര് ദേവസ്വം ബോര്ഡുകളിലുണ്ട്. അതിനാല് ഈ സംവിധാനം മുഴുവന് പിരിച്ചുവിട്ട് സിവില് സര്വീസ് ഉദ്യോഗസ്ഥര്ക്ക് ചുമതല കൊടുത്ത് അതില് രാഷ്ട്രീയക്കാരെയും ഉള്പ്പെടുത്തി പുതിയൊരു ഭരണസംവിധാനം കൊണ്ടുവരണം.
