ന്യൂദല്‍ഹി: എണ്ണ കൊണ്ടുവരുന്ന ഓയില്‍ ടാങ്കറുകള്‍ എന്ന് വിളിക്കപ്പെടുന്ന എണ്ണ വാഹിനിക്കപ്പലുകള്‍ നിര്‍മ്മിക്കുന്ന കാര്യത്തില്‍ ആത്മനിര്‍ഭര്‍ ഭാരതിലേക്ക് കുതിക്കാന്‍ ഇന്ത്യ. ഇതുവഴി ഇന്ത്യയിലേക്ക് എണ്ണ കൊണ്ടുവരുന്ന വിദേശ എണ്ണ വാഹിനിക്കപ്പലുകളെ ആശ്രയിക്കേണ്ടതില്ലാത്ത സാഹചര്യമുണ്ടാകുമെന്നും അതോടെ ഇന്ത്യയ്‌ക്ക് ഈ വകയില്‍ 70,591 കോടി രൂപയോളം എല്ലാവര്‍ഷവും ലാഭിക്കാന്‍ സാധിക്കുമെന്നും പെട്രോളിയം മന്ത്രി ഹര്‍ദ്ദീപ് സിങ്ങ് പുരി.
മുംബൈയില്‍ നടക്കുന്ന ഇന്ത്യന്‍ മാരിടൈം വീക്ക് 2025ല്‍ സംസാരിക്കുകയായിരുന്നു ഹര്‍ദ്ദീപ് സിങ്ങ് പുരി. ഇന്ത്യയുടെ പൊതുമേഖലാ എണ്ണക്കമ്പനികളായ ഇന്ത്യന്‍ ഓയില്‍ കോര്‍പറേഷന്‍, ഭാരത് പെട്രോളിയം, ഹിന്ദുസ്ഥാന്‍ പെട്രോളിയം എന്നീ കമ്പനികള്‍ വര്‍ഷം തോറും എണ്ണ കൊണ്ടുവരാന്‍ വിദേശ എണ്ണവാഹിനിക്കപ്പലുകള്‍ക്ക് 70,591 കോടി രൂപയോളം ചെലവഴിക്കുന്നുണ്ടെന്നും ഹര്‍ദ്ദീപ് സിങ്ങ് പുരി പറഞ്ഞു.
ഇന്ത്യയുടെ വ്യാപാരത്തിന്റെ 28 ശതമാനം എണ്ണ ഇടപാടാണ്. ഇതില്‍ ഇന്ത്യന്‍ എണ്ണവാഹിനിക്കപ്പലുകള്‍ 20 ശതമാനം എണ്ണ മാത്രമേ കൊണ്ടുവരുന്നുള്ളൂ. ബാക്കി 80 ശതമാനവും വിദേശക്കപ്പലുകളാണ് കൊണ്ടുവരുന്നത്. ഈ വെല്ലുവിളി ഇന്ത്യ ഏറ്റെടുത്ത് എണ്ണ വാഹിനിക്കപ്പലുകളുടെ കാര്യത്തില്‍ ആത്മനിര്‍ഭര്‍ ഭാരത് നടപ്പാക്കും. ഇത് മാത്രമല്ല, സമുദ്രയാനവുമായി ബന്ധപ്പെട്ട് ഊര്‍ജ്ജമേഖലയില്‍ വേറെയും നിക്ഷേപങ്ങള്‍ നടത്താനൊരുങ്ങുകയാണ് ഇന്ത്യയെന്നും ഹര്‍ദ്ദീപ് സിങ്ങ് പുരി പറഞ്ഞു.
