ന്യൂദല്‍ഹി: നികുതിഘടന മോശമായതിനാല്‍ ഇന്ത്യയില്‍ പണം നിക്ഷേപിക്കാന്‍ കൊള്ളില്ലെന്ന് 240 കോടിയുടെ ദുബായ് ലോട്ടറിയടിച്ച അനില്‍കുമാര്‍ ബൊല്ല പറഞ്ഞതായി ഇന്ത്യന്‍ എക്സ്പ്രസ് റിപ്പോര്‍ട്ട്. തെലുങ്കാന സ്വദേശിയായ 29 കാരന്‍ ബൊല്ലയെ ഇതോടെ പഞ്ഞിക്കിട്ടിരിക്കുകയാണ് സമൂഹമാധ്യമങ്ങള്‍.
ലോട്ടറി അടിച്ച ഉടന്‍ ലക്ഷ്വറി കാറും ലക്ഷ്വറി വില്ലയും എവിടെ കിട്ടുമെന്നാണ് അനില്‍ കുമാര്‍ ബൊല്ല ആദ്യം അന്വേഷിച്ചതെന്നും ബൊല്ലയ്‌ക്ക് സാമ്പത്തിക ശാസ്ത്രത്തെക്കുറിച്ച് ഒരു ധാരണയില്ലെന്നും എവിടെ നിക്ഷേപം ഇറക്കണമെന്ന് അറിയില്ലെന്നും ചിലര്‍ പ്രതികരിക്കുന്നു.
ഇന്ത്യയില്‍ നികുതിഘടന പരിഷ്കരിച്ച കാര്യം ബൊല്ലയ്‌ക്ക് അറിയില്ലേയെന്നും ഇപ്പോള്‍ ജിഎസ് ടി കുറച്ചതോടെ ദീപാവലിക്കാലത്ത് കോടികളുടെ ബിസിനസ് കുതിപ്പ് ഉണ്ടായതൊന്നും അറിഞ്ഞില്ലേയെന്നും മറ്റ് ചിലര്‍ ചോദിക്കുന്നു.
“ഇന്ത്യയില്‍ ഗൂഗിള്‍ ഉള്‍പ്പെടെ വമ്പന്‍ കോര്‍പറേറ്റുകള്‍ കോടികള്‍ വാരിയെറിയുന്നു. നികുതി മോശമായതുകൊണ്ടാണോ ഇത്? എത്രയോ കമ്പനികള്‍ ഇന്ത്യയില്‍ പണമിറക്കി ലാഭം കൊയ്യുന്നു?”- മറ്റൊരാള്‍ പറയുന്നു.
“ഇന്ത്യയുടെ നികുതിഘടനയെ കുറ്റം പറയരുത്. വലിയൊരു ജനസംഖ്യയുള്ള രാജ്യമാണ് ഇന്ത്യ. റേഷന്‍ നല്‍കി പാവങ്ങളെ ഊട്ടാന്‍ ശ്രമിക്കുന്ന രാജ്യമാണ് ഇന്ത്യ. പാവങ്ങള്‍ക്ക് കക്കൂസും വീടും പണിതുനല്‍കാന്‍ ഇന്ത്യന്‍ സര്‍ക്കാര്‍ ശ്രമിക്കുന്നു. സൈന്യത്തിനും ദുരിതാശ്വാസത്തിനും നികുതിപ്പണം നീക്കിവെയ്‌ക്കുന്നു. ന്യൂനപക്ഷസമുദായങ്ങള്‍ക്ക് വിദേശത്തെ ആരാധനാലയങ്ങള്‍ സന്ദര്‍ശിക്കാനും മതപഠനശാലകളില്‍ പഠിക്കാനും കേന്ദ്രസര്‍ക്കാര്‍ പണം ചെലവഴിക്കുന്നു.”- രശ്മി പ്രശാന്ത് പ്രതികരിക്കുന്നു.
” ഫൈവ് സ്റ്റാര്‍ സര്‍വ്വീസല്ലെങ്കിലും ഇന്ത്യ നികുതിപ്പണം കൊണ്ട് സാധാരണക്കാര്‍ക്ക് മോശമല്ലാത്ത ആരോഗ്യസേവനവും വിദ്യാഭ്യാസവും നല്‍കുന്നുണ്ട്.”-വിനോദ് ജന്നു എഴുതുന്നു.
ഇന്ത്യയുടെ ശക്തമായ വളര്‍ച്ച ഭാവിയില്‍ നികുതിയെ മറികടന്ന് മുന്നോട്ട് പോകുമെന്നാണ് രാജ്കുമാര്‍ ദാസ് കുറിയ്‌ക്കുന്നത്. “ലോകം മുഴുവന്‍ ഇന്ത്യയില്‍ പണം നിക്ഷേപിക്കുന്നുണ്ട്. ശരിയായ സംസ്ഥാനം തെരഞ്ഞെടുക്കൂ” എന്നും ഒരാള്‍ ചൂണ്ടിക്കാട്ടുന്നു.
നിങ്ങളുടെ ലാഭത്തില്‍ നിന്നും 12.5 ശതമാനംമാത്രമേ ഇന്ത്യയില്‍ ഈടാക്കുന്നുള്ളൂ. ഇതും വലിയ നികുതിയാണോ എന്ന ചോദ്യമുയര്‍ത്തുകയാണ് കേതന്‍ ദാണ്ഡ്.
ബൊല്ല എന്ന തെലുങ്കാനക്കാരനായ ചെറുപ്പക്കാരനെക്കൊണ്ട് ഇന്ത്യയുടെ നികുതിഘടന മോശമാണെന്നും ഇവിടെ നിക്ഷേപിക്കാന്‍ കൊള്ളില്ലെന്നും പറയിച്ചത് രാഷ്‌ട്രീയ ദുഷ്ടലാക്കുള്ള ചിലരാണെന്നും ചൂണ്ടിക്കാണിക്കപ്പെടുന്നു. മോദിയെയും ബിജെപി സര്‍ക്കാരിനെയും വിമര്‍ശിക്കാന്‍ അവസരങ്ങള്‍ നോക്കിയിരിക്കുന്നവരുടെ നേരമ്പോക്കായി മാത്രം ഇതിനെ കണ്ടാല്‍ മതിയെന്നും കമന്‍റുകള്‍ ഉണ്ട്. അതേ സമയം രാഷ്‌ട്രീയ എതിരാളികള്‍ ഇന്ത്യയ്‌ക്കെതിരെ ഒട്ടേറെ വിമര്‍ശനങ്ങള്‍ ഉയര്‍ത്തുന്നത് വായിച്ചാലേ ബൊല്ലയുടെ പ്രസ്താവന രാഷ്‌ട്രീയപ്രേരിതമാണെന്നും അതിന് പിന്നില്‍ അജണ്ടയുണ്ടെന്നും എളുപ്പത്തില്‍ മനസ്സിലാവും.
