കോഴിക്കോട്: കനകമല ഐഎസ് റിക്രൂട്ട്മെന്റ് കേസിലെ എന്ഐഎ സാക്ഷിയെ ഭീഷണിപ്പെടുത്തിയ സംഭവത്തില് എസ്ഡിപിഐക്കാരനെതിരെ പോലീസ് കേസെടുത്തു. എസ്ഡിപിഐയുടെ സജീവ പ്രവര്ത്തകനായ ഫസല് റഹ്മാനെതിരെയാണ് രണ്ട് എഫ്ഐആറുകള് രേഖപ്പെടുത്തിയിരിക്കുന്നത്. നിരോധിത ഭീകരസംഘടനയായ പിഎഫ്ഐയുടെ അംഗമായിരുന്ന ഇയാള്, സംഘടന നിരോധിച്ചതിന് ശേഷം എസ്ഡിപിഐയില് പ്രവര്ത്തനം ആരംഭിച്ചതായാണ് പോലീസ് വ്യക്തമാക്കുന്നത്. കോഴിക്കോട് കൂളിമാട് സ്വദേശിയും എന്ഐഎ കേസിലെ പ്രധാന സാക്ഷിയുമായ ഫയാസിനെയാണ് ഫസല് റഹ്മാന് ഭീഷണിപ്പെടുത്തിയത്. ഫയാസിന്റെ ഭാര്യ നടത്തുന്ന ഹോട്ടലില് എത്തിയാണ് ഇയാള് ഭീഷണിപ്പെടുത്തിയത്. ഭീകരപ്രവര്ത്തനങ്ങള്ക്ക് ഒത്താശ ചെയ്യല് ഉള്പ്പെടെയുള്ള ഭാരതീയ ന്യായസംഹിതയിലെ വകുപ്പുകള് ചേര്ത്താണ് പോലീസ് കേസെടുത്തിരിക്കുന്നത്.
2016 ഒക്ടോ. 2-ന് ഗാന്ധിജയന്തി ദിനത്തിലാണ് കണ്ണൂര് ജില്ലയിലെ കനകമല ആസ്ഥാനമാക്കി ഐഎസ് റിക്രൂട്ട്മെന്റ് നടന്നത്. ഇന്റലിജന്സ് ബ്യൂറോ റിപ്പോര്ട്ടിന്റെ അടിസ്ഥാനത്തില് എന്ഐഎയുടെ പ്രത്യേക സംഘം കനകമലയില് എത്തി പ്രതികളെ അറസ്റ്റ് ചെയ്തിരുന്നു. കണ്ണൂര് ജില്ലയിലെ ചൊക്ലി പൊലീസ് സ്റ്റേഷന് പരിധിയിലാണ് കനകമല. കേരളത്തിലും തമിഴ്നാട്ടിലുമായി സ്ഫോടന പരമ്പര ആസൂത്രണം ചെയ്തതായാണ് അന്വേഷണത്തില് വെളിപ്പെട്ടത്. ഈ കേസില് ആദ്യം അറസ്റ്റിലായ ഫയാസ് പിന്നീട് എന്ഐഎയുടെ മാപ്പുസാക്ഷിയായി മാറി. ഫയാസിനെ തുടര്ച്ചയായി ഭീഷണിപ്പെടുത്തുന്ന ഫസല് റഹ്മാന് ഇപ്പോഴും ഐഎസ് ആശയത്തിന്റെ അനുകൂലിയാണ് എന്ന് പോലീസ് കണ്ടെത്തി.
