കൊച്ചി: എറണാകുളം മഹാരാജാസ് കോളേജില് എസ് എഫ് ഐ പ്രവര്ത്തകന് അഭിമന്യു കൊല്ലപ്പെട്ട കേസില് വിചാരണ തുടങ്ങുന്നതിന് മുന്നോടിയായി പ്രതികളെ കുറ്റപത്രം വായിച്ച് കേള്പ്പിച്ചു.എസ് ഡി പി ഐ-പോപ്പുലര് പ്രണ്ട് പ്രവര്ത്തകരായ 16 പ്രതികളാണ് എറണാകുളം സെഷന്സ് കോടതിയില് തിങ്കളാഴ്ച ഹാജരായത്.
കുറ്റം ചെയ്തിട്ടില്ലെന്ന് പ്രതികള് കോടതിയില് പറഞ്ഞു.26 പ്രതികളുടെ കുറ്റപത്രമാണ് പ്രോസിക്യൂഷന് കോടതിയില് ഹാജരാക്കിയത്.
2018 ജൂലായ് 2 നാണ് ക്യാമ്പസിലെ ചുവരെഴുത്ത് സംബന്ധിച്ച തര്ക്കത്തിനിടെ അഭിമന്യു കുത്തേറ്റ് മരിച്ചത്.കേസിലെ സുപ്രധാന രേഖകള് കോടതിയില് നിന്ന് കാണാതായത് വലിയ കോളിളക്കമുണ്ടാക്കിയിരുന്നു. രേഖകള് വീണ്ടും തയാറാക്കിയാണ് വിചാരണ നടപടികളിലേക്ക് കടന്നത്.
വിചാരണ നീണ്ടുപോകുന്നത് ചൂണ്ടിക്കാട്ടി അഭിമന്യുവിന്റെ മാതാപിതാക്കള് ഹൈക്കോടതിയെ സമീപിച്ചിരുന്നു. ഒമ്പത് മാസത്തിനുള്ളില് നടപടികള് പൂര്ത്തിയാക്കാന് ഉത്തരവിടുകയും ചെയ്തു.
