പാലക്കാട്: രാഷ്ട്രപതി ദ്രൗപദി മുര്മുവിന്റെ ശബരിമല ദര്ശനത്തെ തുടര്ന്ന് ഭക്തരെ മാറ്റി നിര്ത്തിയതിനെ വിമര്ശിച്ച് ഡിവൈഎസ്പിയുടെ വാട്സ്ആപ്പ് സ്റ്റാറ്റസ്. ആലത്തൂര് ഡിവൈഎസ്പി ആര്.മനോജ് കുമാറാണ് വിവാദ സ്റ്റാറ്റസ് ഇട്ടത്.
ഒരു വ്യക്തിക്കായി ഭക്തരെ തടയരുതെന്നാണ് ഡി വൈ എസ് പിയുടെ സ്റ്റാറ്റസ്. തൊഴാന് ആര്ക്കും വിഐപി പരിഗണന നല്കരുതെന്നും ഹൈക്കോടതി വിധികള് കാറ്റില് പറത്തിയാണ് രാഷ്ട്രപതിയുടെ സന്ദര്ശനമെന്നും സ്റ്റാറ്റസില് പറയുന്നു.
ഇത് പിണറായി വിജയനോ ഇടതുമന്ത്രിമാരോ ആയിരുന്നെങ്കില് എന്താകുമായിരുന്നു പുകിലെന്ന് സ്റ്റാറ്റസില് ചോദിക്കുന്നു.യൂണിഫോമിട്ട സെക്യൂരിറ്റി ഉദ്യോഗസ്ഥര് 18 -ാം പടി കയറിയും പലവിധ ആചാര ലംഘനങ്ങള് ഇന്ത്യന് പ്രസിഡന്റും സുരക്ഷാ ഉദ്യോഗസ്ഥരും നടത്തിയപ്പോള് ഒരു പാര്ട്ടിയും ഒരുവിധ നാമജപ യാത്രകളും നടത്തിയില്ല. മാപ്രകള് ചിലച്ചില്ല. അപ്പോള് പ്രശ്നം വിശ്വാസമോ ആചാരമോ അല്ല. എല്ലാം രാഷ്ട്രീയമാണ് എന്നാണ് ഡിവൈഎസ്പിയുടെ വാട്സ് ആപ്പ് സ്റ്റാറ്റസ്.എന്നാല് ട്രെയിന് യാത്രക്കിടെ വാട്സ്ആപ്പില് വന്ന കുറിപ്പ് അബദ്ധത്തില് സ്റ്റാറ്റസാവുകയായിരുന്നുവെന്നാണ് ഡിവൈഎസ്പിയുടെ വിശദീകരണം.
