ദുബായ് : രണ്ടാമത് ഗ്ലോബൽ ഫുഡ് വീക്ക് ഒക്ടോബർ 21-ന് അബുദാബിയിൽ ആരംഭിച്ചു. അബുദാബി മീഡിയ ഓഫീസാണ് ഇക്കാര്യം അറിയിച്ചത്. പ്രെസിഡെൻഷ്യൽ കോർട്ട് ഫോർ സ്പെഷ്യൽ അഫയേഴ്‌സ് വൈസ് ചെയർമാൻ ഹംദാൻ ബിൻ മുഹമ്മദ് ബിൻ സായിദ് അൽ നഹ്യാൻ ഉദ്ഘാടന ചടങ്ങിൽ പങ്കെടുത്തു.
അദ്ദേഹം പ്രദർശന വേദിയിലെ വിവിധ പവലിയനുകൾ സന്ദർശിച്ചു. എഴുപത്തഞ്ച് രാജ്യങ്ങളിൽ നിന്നായി ഭക്ഷ്യ വ്യവസായം, സുസ്ഥിര കൃഷി എന്നീ മേഖലകളിലെ 2070 പ്രമുഖ കമ്പനികൾ ഗ്ലോബൽ ഫുഡ് വീക്കിൽ പങ്കെടുക്കുന്നുണ്ട്. അബുദാബിയിലെ ADNEC സെന്ററിൽ വെച്ച് നടത്തുന്ന രണ്ടാമത് ഗ്ലോബൽ ഫുഡ് വീക്ക് 2025 ഒക്ടോബർ 23 വരെ നീണ്ട് നിൽക്കും. അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റിയാണ് (ADAFSA) ഈ പരിപാടി സംഘടിപ്പിക്കുന്നത്.
ഭക്ഷ്യ, കാർഷിക മേഖലകളിലെ വിദഗ്ദർ, വ്യാവസായിക പ്രമുഖർ തുടങ്ങിയവർ ഈ പരിപാടിയിൽ പങ്കെടുക്കുന്നുണ്ട്. സുസ്ഥിരതയിലൂന്നിയുള്ള ഭക്ഷ്യ സംവിധാനങ്ങൾ ഒരുക്കുന്നതിൽ ആഗോളതലത്തിൽ തന്നെ ആശയങ്ങൾ കൈമാറുന്നതിനുള്ള ഒരു വേദിയായി അബുദാബിയെ നിലനിർത്തുന്നതിൽ ഈ പരിപാടി പ്രധാന പങ്ക് വഹിക്കുന്നു. കാർഷിക, ഭക്ഷ്യ, സുസ്ഥിര മേഖലകളിലെ സുപ്രധാന വെല്ലുവിളികളെ ഗ്ലോബൽ ഫുഡ് വീക്ക് അവലോകനം ചെയ്യുന്നതാണ്.
