മംഗളൂരു: കർണാടക മുഖ്യമന്ത്രി സിദ്ധരാമയ്യ പങ്കെടുത്ത പുത്തൂരിലെ പരിപാടിയിൽ കാത്തിരുന്ന് അവശരായ 13 പേർ കുഴഞ്ഞുവീണു. കരൂരിൽ വിജയുടെ പ്രോഗ്രാമിൽ പങ്കെടുത്തതിന് സമാനമായിരുന്നു ഈ അപകടവും. ആറ് മണിക്കൂറിലധികം കാത്തിരുന്ന പ്രായമേറിയ 13 പേർക്കാണ് ദേഹാസ്വാസ്ഥ്യം ഉണ്ടായത്. പുത്തൂർ എംഎൽഎ അശോക് കുമാർറൈയിയുടെ അധ്യക്ഷതയിൽറൈയ് എസ്റ്റേറ്റ് എജുക്കേഷണൽ ആൻഡ് ചാരിറ്റബിൾ ട്രസ്റ്റ് സംഘടിപ്പിച്ച ‘അശോക ജന മന 2025’ പരിപാടിക്കിടെയാണ് സംഭവം.
ഉച്ചയ്‌ക്ക് 12 മണിക്ക് മുഖ്യമന്ത്രി എത്തുമെന്നാണ് പറഞ്ഞത്. എന്നാൽ, ഒരു മണിക്കാണ് എത്തിയത്. സാരിയും ഭക്ഷണവും നൽകുന്നതിനിടയിലെ തിരക്കിൽ പെട്ടാണ് അപകടം. ദേഹാസ്വാസ്ഥ്യം ഉണ്ടായവരെ പുത്തൂരിലെ സർക്കാർ ആസ്പത്രിയിൽ പ്രഥമശുശ്രൂഷ നൽകി വിട്ടയച്ചു. ആർക്കും പരിക്കില്ല.
