കോട്ടയം: യൂത്ത് കോണ്‍ഗ്രസിലും കോണ്‍ഗ്രസിലും പ്രതീക്ഷിച്ച സ്ഥാനങ്ങള്‍ ലഭിക്കാതിരുന്നതില്‍ നിരാശരായ അബിന്‍ വര്‍ക്കിക്കും ചാണ്ടി ഉമ്മനും പിന്തുണയുമായി ഓര്ത്തഡോക്സ് സഭ. അബിന്‍ വര്‍ക്കിയും ചാണ്ടിയും സഭയുടെ മക്കളാണെന്നും അവരെ ഒരിക്കലും കൈവിടില്ലെന്നും ഗീവര്‍ഗീസ് മാര്‍ യൂലിയോസ്.സാമൂഹിക പ്രതിബദ്ധതയോടെ പ്രവര്‍ത്തിക്കുന്നവരാണ് ഇവര്‍. മലങ്കര സഭയ്‌ക്ക് കരുത്തുറ്റ നേതാക്കന്മാര്‍ എകാലത്തും ഉണ്ടായിട്ടുണ്ട്.
നല്ല നേതാക്കള്‍ സഭയില്‍ നിന്നും ഉയര്‍ന്ന് വന്നിട്ടുണ്ട്. വിദ്യാഭ്യാസ സാമൂഹിക മേഖലകളില്‍ സഭയുടെ സംഭാവന വലുതാണെന്നും ഗീവര്‍ഗീസ് മാര്‍ യൂലിയോസ് പറഞ്ഞു.
സഭ പലവിധത്തില്‍ അവഗണിക്കപ്പെടുന്നു. സഭാ അംഗങ്ങളെ തഴയാന്‍ ശ്രമമുണ്ട്. സഭാംഗങ്ങളെ ഏത് സ്ഥലത്തായാലും അവരെ തഴയാം ഒരു ചിന്തയുണ്ട്.ചെണ്ടയുടെ പ്രത്യേകത എങ്ങനെ കൊട്ടിയാലും അതിന് ശബ്ദമുണ്ട്. ശാസ്ത്രീയമായി അതിനെ കൊട്ടിയാല്‍ മനോഹരമായ ശബ്ദം ഉണ്ടാകും. അശാസ്ത്രീയമായി കൈകാര്യം ചെയ്താല്‍ വ്യത്യസ്തമായ ശബ്ദമുണ്ടാവും. മലങ്കര സഭ ആര്‍ക്കും ഏത് വിധേനയും കൊട്ടാവുന്ന ചെണ്ടയല്ലെന്നും ഗീവര്‍ഗീസ് മാര്‍ യൂലിയോസ് പറഞ്ഞു.
അബിന്‍ വര്‍ക്കിയും ചാണ്ടിയും ഉമ്മനും മതം വെച്ച് കളിക്കാറില്ല. അവരാരും ഇന്ന സഭക്കാരാണെന്ന് പറയാറില്ല. പൊതുരംഗത്ത് പ്രവര്‍ത്തിക്കുമ്പോള്‍ ഒരു മത തീവ്രവാദത്തിനും സഭ കൂട്ടു നില്‍ക്കില്ല. സഭയ്‌ക്ക് എല്ലാ കാലത്തും നല്ല നേതാക്കന്മാര്‍ ഉണ്ടായിട്ടുണ്ട് ഇനിയും അത് ഉണ്ടാകും.
ചെണ്ട കഴിയുന്നതും നല്ല സ്വരം പുറപ്പെടുവിക്കാന്‍ ആണ് ശ്രമിക്കുന്നത്. അല്ലാത്തപക്ഷം ശബ്ദം മാറാന്‍ സാധ്യതയുണ്ട് എന്നു കൂടി മനസിലാക്കണം- ഗീവര്‍ഗീസ് മാര്‍ യൂലിയോസ് മുന്നറിയിപ്പ് നല്‍കി.
