കണ്ണൂര്‍: അഖില ഭാരത അയ്യപ്പ സേവാസംഘത്തിന്റെ ആഭിമുഖ്യത്തില്‍ ശബരിമല സന്നിധാന സംരക്ഷണ ദിനാചരണം സംഘടിപ്പിക്കും. ശബരിമലയില്‍ സമീപകാലത്ത് നടന്ന സംഭവവികാസങ്ങളോടനുബന്ധിച്ച് വിശ്വാസ സമൂഹത്തിന് ഉണ്ടായ വേദനക്ക് ഉടനടി പരിഹാരം ഉണ്ടാക്കണമെന്ന് ആവശ്യപ്പെട്ട് തിരുവിതാംകൂര്‍ ദേവസ്വം ബോര്‍ഡ് ആസ്ഥാനത്തിന് മുമ്പില്‍ ‘സന്നിധാന സംരക്ഷണ ദിനാചരണം’ നടത്തുന്നതിന് കണ്ണൂരില്‍ നടന്ന അയ്യപ്പ സേവാസംഘം ദേശീയ എക്‌സി. യോഗം തീരുമാനിച്ചു.
25ന് രാവിലെ 11 മണിക്ക് അയ്യപ്പ സേവാസംഘം ദേശീയ പ്രസിഡന്റ് അഡ്വ. എം. രാജഗോപാലന്‍ നായര്‍ പരിപാടി ഉദ്ഘാടനം ചെയ്യും. സംഘടനയുടെ കേരളത്തിന് അകത്തും പുറത്തുമുള്ള പ്രവര്‍ത്തകര്‍ പരിപാടിയില്‍ പങ്കെടുക്കുമെന്ന് ദേശീയ സെക്രട്ടറി കൊയ്യം ജനാര്‍ദ്ദനന്‍ പറഞ്ഞു.
ശബരിമലയെ വിവാദങ്ങളില്‍ നിന്ന് ഒഴിവാക്കി ഭക്തര്‍ക്ക് സുഗമമായ മണ്ഡലകാലം ഒരുക്കുന്നതിന് ദേവസ്വം ബോര്‍ഡിനെ സജ്ജമാക്കാന്‍ വേണ്ട നടപടികള്‍ സര്‍ക്കാരും കൈക്കൊള്ളണമെന്ന് യോഗം ആവശ്യപ്പെട്ടു. സന്നിധാനത്ത് അയ്യപ്പ സേവാസംഘം പതിറ്റാണ്ടുകളായി നടത്തി വന്നിരുന്ന സേവന പ്രവര്‍ത്തനങ്ങള്‍ തുടരാന്‍ ദേവസ്വം ബോര്‍ഡ് അനുവാദം നല്‍കണമെന്നും ഭക്തജന വിശ്വാസം വീണ്ടെടുക്കുന്നതിനായി ദേവപ്രശ്‌നം നടത്തുന്നതിനും ബോര്‍ഡ് തയാറാകണമെന്ന് യോഗം ആവശ്യപ്പെട്ടു.
അഡ്വ. എം. രാജഗോപാലന്‍ നായര്‍ അധ്യക്ഷത വഹിച്ചു. യോഗത്തില്‍ വൈസ് പ്രസിഡന്റുമാരായ ജയകുമാര്‍ തിരുനക്കര, വേണു പഞ്ചവടി, അഡ്വ. ഷിബുകുമാര്‍, സ്റ്റേറ്റ് പ്രസിഡന്റ് സി.എം. സലിമോന്‍, സെക്രട്ടറി ടി.കെ. പ്രസാദ്, ട്രഷറര്‍ ടി.പി. അരവിന്ദാക്ഷന്‍, എക്‌സി. കമ്മിറ്റി അംഗങ്ങളായ കെ.സി. സോമന്‍ നമ്പ്യാര്‍, ഗിരീഷ്, വിനോദ് എന്നിവര്‍ പ്രസംഗിച്ചു.
