മലപ്പുറം മഞ്ചേരിയിൽ ഇരുനില കെട്ടിടത്തിന്റെ ടെറസിൽ ഒരു മാസം പഴക്കമുള്ള മനുഷ്യന്റെ അസ്ഥികൂടം കണ്ടെത്തി. കെട്ടിടത്തിന് മുകളിൽ സ്ഥാപിച്ചിരുന്ന ഫ്ലെക്സ് ബോർഡുകൾ നീക്കം ചെയ്യാനെത്തിയ തൊഴിലാളികളാണ് അസ്ഥികൂടം കാണുകയും ഉടൻ പോലീസിനെ അറിയിക്കുകയും ചെയ്തത്.
വിവരം ലഭിച്ചതിനെ തുടർന്ന് മഞ്ചേരി പോലീസും ഫോറൻസിക് ഉദ്യോഗസ്ഥരും സ്ഥലത്തെത്തി. ടെറസിൽ കൂട്ടിയിട്ടിരുന്ന പഴയ ഗാർഹിക വസ്തുക്കൾക്കിടയിൽ ചിതറിക്കിടന്ന അസ്ഥികൂടത്തിന്റെ അവശിഷ്ടങ്ങൾ ശേഖരിച്ചു. അസ്ഥികൂടത്തിന് ഒരു മാസത്തോളം പഴക്കമുണ്ടെന്നാണ് പോലീസിന്റെ പ്രാഥമിക കണ്ടെത്തൽ.
എന്നാൽ, മരിച്ചയാളെക്കുറിച്ചുള്ള വിവരങ്ങളൊന്നും ഇതുവരെ ലഭിച്ചിട്ടില്ല.കെട്ടിടത്തിൽ നേരത്തെ ഒരു തമിഴ്നാട് കുടുംബം താമസിച്ചിരുന്നതായി പോലീസ് നടത്തിയ അന്വേഷണത്തിൽ കണ്ടെത്തിയിട്ടുണ്ട്. ഈ കുടുംബാംഗങ്ങൾക്കായി അന്വേഷകർ തിരച്ചിൽ ആരംഭിച്ചു.
നിലവിൽ തമിഴ്നാട്ടിൽ നിന്നുള്ള ഇതര സംസ്ഥാന തൊഴിലാളികളാണ് കെട്ടിടത്തിൽ താമസിക്കുന്നത്.ഇവരെയും പോലീസ് ചോദ്യം ചെയ്തുവരികയാണ്.
