മെല്‍ബണ്‍: ശിവഗിരി മഠത്തിന്റെ ആഭിമുഖ്യത്തില്‍ മെല്‍ബണിലെ വിക്ടോറിയന്‍ പാര്‍ലമെന്റില്‍ ലോകമത പാര്‍ലമെന്റ് സംഘടിപ്പിച്ചു. ശ്രീനാരായണ ധര്‍മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദയുടെ അദ്ധ്യക്ഷതയില്‍ നടന്ന സമ്മേളനം ഓസ്‌ട്രേലിയന്‍ സംസ്ഥാനമായ വിക്ടോറിയയുടെ ഗവ. പ്രീമിയര്‍ ജസീന്ത അലന്‍ ഉദ്ഘാടനം ചെയ്തു. ധര്‍മസംഘം ട്രസ്റ്റ് ജനറല്‍ സെക്രട്ടറി സ്വാമി ശുഭാംഗാനന്ദ അനുഗ്രഹ പ്രഭാഷണം നടത്തി. ഡോ. ശശി തരൂര്‍ ഗുരുവിന്റെ മതദര്‍ശനം അവതരിപ്പിച്ചു. ഗുരുവിന്റെ ചിത്രം ആലേഖനം ചെയ്ത ആസ്‌ട്രേലിയന്‍ സര്‍ക്കാര്‍ സ്മാരക സ്റ്റാമ്പ് വേദിയില്‍ ജസീന്ത അലന്‍ പ്രകാശനം ചെയ്തു. മന്ത്രി ഇന്‍ഗ്രിഡ് സ്റ്റിട്ട്, ഗവ. വിപ്പ് ലീ ടര്‍ലാമീസ്, മന്ത്രി ജാക്ലിന്‍ സിസ്, പാര്‍ലമെന്ററി സെക്രട്ടറി ഷീന വാട്ട്, ഡെപ്യൂട്ടി സ്പീക്കര്‍ മാട്ട് ഫ്രിഗല്‍, ഉക്രേനിയന്‍ കത്തോലിക്ക അപ്പസ്‌തോലിക് വിസിറ്റേറ്റര്‍ മൈക്കോള കര്‍ദ്ദിനാള്‍ ബൈചോക്ക്, ക്വാങ് മിന്‍ ബുദ്ധസംന്യാസി ഫ്യൂക് ടാന്‍ തിച്ച്, അല്‍ബേനിയന്‍ മുസ്ലീം സൊസൈറ്റി ഓഫ് ഷെപ്പാര്‍ട്ടണ്‍ പ്രതിനിധി ഇമാം ഹിസ്‌നി മെര്‍ജ, സിക്ക് മത സംന്യാസി ദിഗമദുല്ലെ വിമലാനന്ദ നായക തേരോ, ഔംസായി സംസ്ഥാന്‍ പ്രതിനിധി കിരുബാശങ്കര്‍ നടരാജന്‍ അയ്യ, സീ ചെങ് ഖോര്‍ മോറല്‍ അപ്‌ലിഫ്റ്റിങ് സൊസൈറ്റി പ്രതിനിധി സ്റ്റീഫന്‍ ചെവ്, ഗുരുദ്വാര ശ്രീഗുരുനാനാക്ക് ദര്‍ബാര്‍ ഓഫീസര്‍ ഭായ് ബീര്‍ സിംഗ്, ഫാ. ജോസി കെ. കുര്യാക്കോസ് (കത്തോലിക്കാ സഭ), ഫാ. ഫിലിപ്പ് മാത്യു (മാര്‍ത്തോമാ ചര്‍ച്ച്), ഫാ. ജിബിന്‍ സാബു (ഓര്‍ത്തഡോക്‌സ് ചര്‍ച്ച്), ഫാ. ലിനു ലൂക്കോസ് (ഓര്‍ത്തഡോക്‌സ്), ഫാ. ജിജി മാത്യു (ഓര്‍ത്തഡോക്‌സ്), പാസ്റ്റര്‍ ജേക്കബ് സൈമണ്‍ (പെന്തക്കോസ്ത്), ഫാ. ഡെന്നിസ് വി.കെ. (യാക്കോബായ) തുടങ്ങിയവര്‍ സംസാരിച്ചു.
ചൈനീസ്, ശ്രീലങ്കന്‍, സിക്ക്, മാര്‍ത്തോമ പെന്തക്കോസ്ത്, ഹിന്ദുമത നേതാക്കന്മാര്‍ തുടങ്ങിയവര്‍ മാനവികത, ലോകസൗഹാര്‍ദ്ദം, ഐക്യം, സമാധാനം, കാരുണ്യം എന്നീ വിഷയങ്ങളില്‍ പ്രഭാഷണം നടത്തി. സ്വാമി സച്ചിദാനന്ദ തയാറാക്കിയ ശ്രീനാരായണ ഗുരൂസ് വിഷന്‍ ഓഫ് യൂണിവേഴ്‌സല്‍ ബ്രതര്‍ഹുഡ്, മങ്ങാട് ബാലചന്ദ്രന്‍ തയാറാക്കിയ ശ്രീനാരായണ ഗുരു ദി പ്രോഫെറ്റ് ഓഫ് ദി പീസ് എന്നീ ഗ്രന്ഥങ്ങള്‍ ചടങ്ങില്‍ പ്രകാശനം ചെയ്തു. മലയാളികളല്ലാത്തവരും പതിനാറോളം മതങ്ങളുടെ പ്രതിനിധികളുമായി എണ്‍പതോളം മതപണ്ഡിതന്മാര്‍ മതദര്‍ശനങ്ങള്‍ അവതരിപ്പിച്ചു. ആലുവ സര്‍വമതസമ്മേളന ശതാബ്ദി ആഘോഷങ്ങളുടെ ഭാഗമായാണ് ആസ്‌ട്രേലിയയില്‍ ലോക മതപാര്‍ലമെന്റ് സംഘടിപ്പിച്ചത്.
ആസ്‌ട്രേലിയയിലെ വിക്ടോറിയന്‍ പാര്‍ലമെന്റില്‍ നടന്ന ലോകമത പാര്‍ലമെന്റ് ചരിത്രത്തിലെ നാഴികക്കല്ലായി മാറിയെന്ന് ശ്രീനാരായണ ധര്‍മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പറഞ്ഞു. ശ്രീനാരായണ ഗുരുദേവന്റെ ഒരു ജാതി ഒരു മതം ഒരു ദൈവം മനുഷ്യന് എന്ന സന്ദേശത്തിന് ഒരൊറ്റ ലോകം ഒരൊറ്റ ജനത ഒരൊറ്റ നീതി എന്ന നവീനമായ വ്യഖ്യാനമാണ് ലോകമെമ്പാടും പ്രചരിക്കുന്നത്.
ആലുവ സര്‍വമതസമ്മേളനാനന്തരം ഗുരു ശിവഗിരിയില്‍ മതമഹാപാഠശാല സ്ഥാപിച്ചു. ഉപനിഷത്തുകളും വേദ ഗ്രന്ഥങ്ങളും ഖുര്‍ആനും ബൈബിളും എല്ലാം ഇവിടെ പാഠ്യവിഷയങ്ങളാണ്. ശിവഗിരിയിലെ ഇന്നത്തെ സ്വാമിമാര്‍ ഇവിടെ അദ്ധ്യയനം ചെയ്താണ് ഗുരുവിന്റെ ഏകലോക സന്ദേശവുമായി ലോകമെങ്ങും സഞ്ചരിക്കുന്നതെന്നും സ്വാമി പറഞ്ഞു.
