തിരുവനന്തപുരം: സംസ്ഥാനത്ത് ഇന്നലെ മാത്രം അമീബിക് മസ്തിഷ്ക ജ്വരം സ്ഥിരീകരിച്ചത് നാല് പേര്ക്കാണെന്ന് ആരോഗ്യവകുപ്പ്. ഈ മാസം ഇതുവരെ 20 പേര്ക്ക് രോഗം സ്ഥിരീകരിച്ചു. പത്തുമാസത്തിനിടെ 25 പേരാണ് മരിച്ചത്.
കൂടുതല് രോഗികളും തെക്കന് കേരളത്തില് ആണെന്നാണ് റിപ്പോര്ട്ടുകള്.
കഴിഞ്ഞ ദിവസം പാലക്കാട് സ്വദേശി 62 കാരന് രോഗം സ്ഥിരീകരിച്ചിരുന്നു. ഇയാള് തൃശൂര് മെഡിക്കല് കോളേജ് ആശുപത്രിയില് അതീവ ഗുരുതരാവസ്ഥയില് ചികിത്സയിലാണ്.പാലക്കാട് ജില്ലയില് ഇതുവരെ മൂന്ന് പേര്ക്കാണ് അമീബിക് മസ്തിഷ്ക ജ്വരം സ്ഥിരീകരിച്ചത്. തിരുവനന്തപുരത്ത് നാല് പേരാണ് ചികിത്സയിലുള്ളത്.
അമീബിക് മസ്തിഷ്ക ജ്വരം സ്ഥിരീകരിച്ചവരില് ഭൂരിഭാഗം ആളുകള്ക്കും രോഗവ്യാപനം ഉണ്ടായത് എങ്ങനെയെന്ന് കണ്ടെത്താന് കഴിഞ്ഞിട്ടില്ല. കെട്ടിനില്ക്കുന്ന വെള്ളത്തില് മുങ്ങിക്കുളിക്കുന്നവരിലും നീന്തുന്നവരിലുമാണ് സാധാരണ രോഗബാധ ഉണ്ടാകുന്നത്. ഈ രോഗത്തിന് മരണനിരക്ക് 97 ശതമാനത്തിലധികമാണ്.
