കോട്ടയം : ശബരിമല സ്വര്‍ണപാളി മോക്ഷണവുമായി ബന്ധപ്പെട്ട് ദേവസ്വം മന്ത്രിയും ഏറ്റുമാനൂര്‍ എം എല്‍ എയുമായ വി എന്‍ വാസവന്റെ ഓഫീസിലേക്ക് തികച്ചും ജനാധിപത്യ രീതിയില്‍ മാര്‍ച്ച് നടത്തിയ ബി ജെ പി പ്രവര്‍ത്തകരെ സി പി എം ഗുണ്ടകളെ ഉപയോഗിച്ച് അക്രമിച്ച നടപടി പ്രതിഷേധാര്‍ഹമെന്ന് ബിജെപി മേഖല അധ്യക്ഷന്‍ എന്‍ ഹരി.
പ്രകടനം കഴിഞ്ഞ് മടങ്ങിയ സ്ത്രീകളെയും കുട്ടികളെയും മാരകായുധങ്ങളുമായിവന്ന സി പി എം സഖാക്കള്‍ പൊലീസുകാരുടെ മുന്നില്‍വച്ച് അക്രമിക്കുകയായിരുന്നു.
സ്ത്രീകളുടെ നിലവിളി കേട്ട് ഓടിയെത്തിയ വി.പി. മുകേഷിനേയും അനീഷിനേയും സരുണ്‍ കെ അപ്പുക്കുട്ടനെയും ചില പൊലീസുകാര്‍ കൊടുത്ത ലാത്തി കൊണ്ട് സഖാക്കള്‍ ക്രൂരമായി അക്രമിക്കുകയായിരുന്നു.
‘തിരുട്ടുഗ്രാമത്തിലെ തലവന്റെ വീട്ടില്‍ റെയ്ഡിനെത്തിയ പൊലീസിനെ നേരിടുന്ന സംഘങ്ങളെ പോലെയാണ്, പ്രകടനം നടത്തിയ ബി ജെ പിക്കാരെ വാസവന്റെ ഗുണ്ടകള്‍ നേരിട്ടത്.
ദേവസ്വം മന്ത്രിയുടെ കൈകള്‍ ശുദ്ധമാണെങ്കില്‍ എന്തിനാണ് ജനകീയ സമരത്തെ ഇത്ര ഭയപ്പെടുന്നത്.
പൊലീസിന്റെ ലാത്തി സാഖാക്കള്‍ക്ക് കൊടുത്ത് അക്രമത്തിന് പ്രേരിപ്പിച്ച പോലീസുകര്‍ക്കെതിരെ നടപടിയെടുക്കുവാന്‍ ജില്ലാ പോലിസ് മേധാവി തയാറാകണം. പൊലീസിന്റെ പണി സഖാകളേറ്റെടുത്താല്‍, അവരെ കൈകാര്യം ചെയ്യാന്‍ ബി ജെ പി പ്രവര്‍ത്തകര്‍ക്കറിയാം. അതിന് ഞങ്ങളെ പ്രേരിപ്പിക്കരുത്.
സി പി എം അക്രമത്തില്‍ പരിക്ക് പറ്റിയ കോട്ടയം മണ്ഡലം പ്രസിഡന്റ് വി.പി. മുകേഷ്, ഏറ്റുമാനൂര്‍ മണ്ഡലം പ്രസിഡന്റ് സരുണ്‍ കെ അപ്പുക്കുട്ടന്‍, ഗുരുതരമായി മുറിവ് പറ്റിയ അനീഷ്, മഹിളാമോര്‍ച്ച പുതുപ്പള്ളി മണ്ഡലം സെക്രട്ടറി നികിത ഷൈജു, മകള്‍ എട്ടാം ക്ലാസ് വിദ്യാര്‍ത്ഥിനി ആരാധ്യ, എസ് സി മോര്‍ച്ച പുതുപ്പള്ളി മണ്ഡലം അധ്യക്ഷ മഞ്ജു ബിനു എന്നിവരെ ബിജെപി മേഖല അധ്യക്ഷന്‍ എന്‍ ഹരി സന്ദര്‍ശിച്ചു.മേഖല സെക്രട്ടറി രവീന്ദ്രനാഥ് വാകത്താനവും സന്ദര്‍ശനത്തില്‍ എന്‍ ഹരിയോടൊപ്പം ഉണ്ടായിരുന്നു.
