ന്യൂദല്‍ഹി: പ്രതിയുമായി നല്ല ബന്ധം പുലര്‍ത്തിയിരുന്നു എന്നതുകൊണ്ട് മാത്രം ലൈംഗികാതിക്രമത്തിന് സ്ത്രീ ഉത്തരവാദിയാകില്ലെന്ന് ഡല്‍ഹി ഹൈക്കോടതി. ലൈംഗികാതിക്രമത്തിന് ഇരയായ വ്യക്തിയുടെ സ്വഭാവത്തില്‍ സംശയം പ്രകടിപ്പിച്ച് സെഷന്‍സ് കോടതി പ്രതിക്ക് ജാമ്യം അനുവദിച്ച നടപടി ജസ്റ്റിസ് അമിത് മഹാജന്‍ റദ്ദാക്കി.
അതിജീവതയ്‌ക്ക് പ്രതിയെ അറിയാമായിരുന്നു എന്നതോ അവനുമായി നല്ല ബന്ധമുണ്ടായിരുന്നു എന്നതോ മാത്രം ലൈംഗികാതിക്രമത്തിന് അവളെ ഉത്തരവാദിയാക്കില്ല. അതിജീവത സ്വമേധയാ അയാളുടെ മുറിയിലേക്ക് വന്നു എന്ന കാരണത്താല്‍ ആര്‍ക്കും അവളെ ലൈംഗികമായി പീഡിപ്പിക്കാന്‍ അവകാശമില്ലെന്നും കോടതി വ്യക്തമാക്കി.
പുരുഷനും സ്ത്രീയും തമ്മിലുള്ള ബന്ധത്തെക്കുറിച്ച് സെഷന്‍സ് കോടതി നിരവധി നിരീക്ഷണങ്ങള്‍ നടത്തിയിരുന്നു. ‘വിദ്യാഭ്യാസമുള്ള പെണ്‍കുട്ടി’യായിരുന്നു അതിജീവതയെന്നും അവളുടെ പ്രവൃത്തിയുടെ അനന്തരഫലങ്ങളെക്കുറിച്ച് അവള്‍ ബോധവതിയായിരിക്കുമെന്നും സെഷന്‍സ് കോടതി പറഞ്ഞിരുന്നു.
ജാമ്യ ഉത്തരവിലെ നിരീക്ഷണങ്ങള്‍ക്കെതിരെയാണ് സ്ത്രീ ഹൈക്കോടതിയെ സമീപിച്ചത്.
