ഇടുക്കി: മൂലമറ്റം പവര്ഹൗസ് മിനിയേച്ചര് മാതൃക ടൂറിസം പദ്ധതി, ഇടുക്കി ഡാം ലേസര് ഷോ പ്രോജക്ട് തുടങ്ങി കെ.എസ്.ഇ.ബിയുമായി ബന്ധപ്പെട്ടുള്ള വിവിധ പദ്ധതികള് നടപ്പാക്കുന്നതിനായി വിദഗ്ധസംഘം പദ്ധതി സ്ഥലങ്ങള് സന്ദര്ശിച്ചു. സുരക്ഷാ കാരണങ്ങളാല് പൊതുജനങ്ങള്ക്ക് സന്ദര്ശനം സാധ്യമാക്കുന്നത് പ്രായോഗികമല്ലാത്ത സാഹചര്യത്തിലാണ് മിനിയേച്ചര് മാതൃക നിര്മ്മിച്ച് ജനങ്ങള്ക്ക് പവര്ഹൗസിന്റെ പ്രവര്ത്തനം ബോധ്യപ്പെടുത്തുന്ന പദ്ധതി നടപ്പാക്കുന്നത്. രണ്ടര ഏക്കര് സ്ഥലത്താണ് പദ്ധതി യാഥാര്ത്ഥ്യമാക്കുന്നത്. മിനിയേച്ചര് സ്ഥാപിക്കുന്നതിന് മൂലമറ്റത്ത് രണ്ട് സ്ഥലങ്ങള് സംഘം സന്ദര്ശിച്ചു. ഇതിന്റെ രേഖകള് പരിശോധിച്ച് പദ്ധതി തയ്യാറാക്കാനുള്ള നടപടികള് സ്വീകരിക്കാന് മന്ത്രി റോഷി അഗസ്റ്റിന് നിര്ദേശിച്ചു.
ഇടുക്കി, ചെറുതോണി ഡാമുകളില് സന്ദര്ശനത്തിന് കൂടുതല് ടൂറിസ്റ്റുകള്ക്ക് അവസരം നല്കും. ഇതിനായി അധികമായി സ്റ്റാഫിനെ നിയോഗിക്കുന്നത് ഉള്പ്പടെയുള്ള നടപടികള് ഹൈഡല് ടൂറിസം വിഭാഗം സ്വീകരിക്കും. കുളമാവ് വടക്കേപ്പുഴയില് കുട്ടവഞ്ചി സഫാരി പ്രോജക്ട് കമ്മീഷന് ചെയ്യുന്നതിന് കെ.എസ്.ഇ.ബി ഡാം സേഫ്റ്റി വിഭാഗം അനുമതി നല്കി. ഈ സാഹചര്യത്തില് പദ്ധതി നടപ്പാക്കാന് ഹൈഡല് ടൂറിസം വിഭാഗത്തിന് നിര്ദേശം നല്കി.
ഇടുക്കി ഡാം ലേസര് ഷോ പ്രോജക്ട് നടപ്പാക്കാമെന്ന് ഐ.ഐ.ടി ചെന്നൈയുടെ സ്ട്രക്ചറല് എഞ്ചിനീയറിങ് വിഭാഗം പഠനം നടത്തി റിപ്പോര്ട്ട് സമര്പ്പിച്ചിരുന്നു. കെ.എസ്.ഇ.ബി ഡാം സേഫ്റ്റി വിഭാഗം പദ്ധതിയ്ക്ക് എന്.ഒ.സി നല്കിയിട്ടുണ്ട്. പ്രാഥമിക പ്രവര്ത്തനങ്ങള് ഉടന് ആരംഭിക്കും.
