ഇടുക്കി : അല്ഫാമിനെ ചൊല്ലി ഹോട്ടലില് അക്രമം നടത്തിയ വിനോദസഞ്ചാരികള് അറസ്റ്റില്.പാലക്കാട് സ്വദേശികളായ മൂന്ന് വിനോദസഞ്ചാരികളാണ് പിടിയിലായത്.തലയ്ക്ക് ഗുരുതരമായി പരിക്കേറ്റ ഹോട്ടല് ജീവനക്കാരന് നിഷാദിനെ എറണാകുളം രാജഗിരി ആശുപത്രിയില് ശാസ്ത്രക്രിയയ്ക്ക് വിധേയനാക്കി.മറ്റ് രണ്ടു ഹോട്ടല് ജീവനക്കാര്ക്കും ആക്രമണത്തില് പരിക്കേറ്റു.
അടിമാലിയില് കഴിഞ്ഞ രാത്രി 12 മണിയോടെ ആണ് സംഭവം. പാലക്കാട് സ്വദേശികളായ അരുണ് സോമന്, അലി അക്ബര്, മുഹമ്മദ് റിയാസ് എന്നിവരാണ് അടിമാലി പൊലീസിന്റെ പിടിയിലായത്.
ടൂര് പാക്കേജറും വിനോദസഞ്ചാരികളും തമ്മിലുണ്ടായ സാമ്പത്തിക തര്ക്കമാണ് ഹോട്ടല് ജീവനക്കാരുമായുള്ള സംഘര്ഷത്തിന് കാരണം. പാലക്കാട് നിന്നുളള 25 അംഗ സംഘമാണ് മൂന്നാറില് വിനോദ സഞ്ചാരത്തിന് എത്തിയത്.ഇവര്ക്ക് ഭക്ഷണം ഒരുക്കിയിരുന്നത് അടിമാലിയിലെ ഹോട്ടലിലായിരുന്നു. ഭക്ഷണം കഴിക്കവെ അല്ഫാമിന് വലിപ്പമില്ല, വൃത്തിയില്ല തുടങ്ങിയ പരാതികള് വിനോദസഞ്ചാരികള് പറഞ്ഞിരുന്നു. പിന്നീട് ഹോട്ടലിന് പുറത്ത് ടൂര് പാക്കേജറിന് പണം നല്കുന്നത് സംബന്ധിച്ച് തര്ക്കമുണ്ടായി. ഹോട്ടല് മാനേജര് ഹോട്ടലിന് മുന്നില് ബഹളം ഉണ്ടാക്കരുതെന്ന് പറഞ്ഞു.തുടര്ന്ന് ഹോട്ടല് മാനേജരെ വിനോദ സഞ്ചാരികളുടെ സംഘത്തിലെ മൂന്ന് പേര് കല്ലു കൊണ്ട് അടിക്കുകയായിരുന്നു.
