കൊച്ചി: കാലടി ശ്രീശങ്കരാചാര്യ സംസ്കൃത സര്വകലാശാലയുടെ ഭൂമി ക്രിക്കറ്റ് സ്റ്റേഡിയത്തിനായി നല്കുന്നു. സിന്ഡിക്കേറ്റില് പോലും ഡിപിആര് മറച്ചുവച്ചുകൊണ്ടാണ് കേരള ക്രിക്കറ്റ് അസോസിയേഷന് (കെസിഎ) സര്വകലാശാല ഭൂമി നല്കുന്നത്. നിയമങ്ങള് അട്ടിമറിച്ചുകൊണ്ടുള്ള വൈസ് ചാന്സലറുടെയും ഇടതു സിന്ഡിക്കേറ്റിന്റെയും പെട്ടെന്നുള്ള ഈ നീക്കത്തില് ഏറെ ദുരൂഹതയുണ്ട്.
ആദ്യഘട്ടത്തില് ആറ് ഏക്കര് സ്ഥലമാണ് 30 വര്ഷത്തെ ലീസിന് ക്രിക്കറ്റ് സ്റ്റേഡിയത്തിനായി കെസിഎക്ക് കൈമാറുന്നത്. പിന്നീട് ആവശ്യത്തിനനുസരിച്ച് നല്കുവാനാണ് രഹസ്യധാരണ. പടിപടിയായി സര്വകലാശാല കാമ്പസ് മറ്റാവശ്യങ്ങള്ക്കായി നല്കി മുഖ്യകേന്ദ്രം അടച്ചുപൂട്ടാനാണ് അധികൃതര് ലക്ഷ്യമിടുന്നത്. സംസ്കൃതത്തിന്റെയും ഭാരതീയ ഭാഷകളുടെയും വളര്ച്ചയ്ക്കും പോഷണത്തിനുമായാണ് ശ്രീശങ്കരാചാര്യരുടെ ജന്മഭൂമിയായ കാലടിയില് സംസ്കൃത സര്വകലാശാല സ്ഥാപിച്ചത്. എന്നാല് സര്വകലാശാലയുടെ ലക്ഷ്യങ്ങളെല്ലാം അട്ടിമറിക്കപ്പെടുകയും സിപിഎമ്മിന്റെയും ഇടതുജിഹാദികളുടെയും വിഹാരകേന്ദ്രമായി മാറുകയുമാണ് ചെയ്തത്. ഇപ്പോഴാകട്ടെ സര്വകലാശാലയ്ക്ക് യാതൊരു പ്രസക്തിയുമില്ലാത്ത ക്രിക്കറ്റ് സ്റ്റേഡിയം സ്ഥാപിക്കാനാണ് ഒരുങ്ങുന്നത്. കഴിഞ്ഞമാസം 24ന് നടന്ന സിന്ഡിക്കേറ്റ് യോഗത്തില് കാര്യങ്ങള് വൈസ് ചാന്സലര് മറച്ചുവയ്ക്കുകയായിരുന്നുവെന്ന ആക്ഷേപമാണ് ഉയരുന്നത്. ഭൂമിയിടപാട് മറച്ചു വയ്ക്കുന്നതും സുതാര്യമല്ലാത്തതുമാണ് ഏറെ ദുരൂഹത ഉയര്ത്തുന്നത്.
കെസിഎക്ക് ഭൂമി കൈമാറിക്കൊണ്ടുള്ള കരാറില് ഒന്പതാം തീയതി ഒപ്പുവയ്ക്കാനാണ് സര്വകലാശാല തീരുമാനിച്ചിരിക്കുന്നതെന്നാണ് അറിയുന്നത്. ഒരു പ്രത്യേക ആവശ്യത്തിനായി ജനങ്ങളില് നിന്നും പൊന്നുംവിലയ്ക്ക് ഏറ്റെടുത്ത ഭൂമി മറ്റാവശ്യങ്ങള്ക്കായി ഉപയോഗിക്കാന് പാടില്ലെന്നാണ് നിയമം. ഇതിനായി ചാന്സലര് കൂടിയായ ഗവര്ണറുടെ അനുമതിയും വേണം. ഇതെല്ലാം തകിടം മറിച്ചുകൊണ്ടാണ് വൈസ് ചാന്സലറും ഇടതു സിന്ഡിക്കേറ്റ് അംഗങ്ങളും ക്രിക്കറ്റ് സ്റ്റേഡിയവുമായി മുന്നോട്ടു പോകുന്നത്.
ക്രിക്കറ്റ് സ്റ്റേഡിയത്തിലൂടെ സംസ്കൃതത്തിന് എന്ത് നേട്ടമാണ് ഉണ്ടാകുന്നതെന്ന ചോദ്യമാണ് സര്വകലാശാലയില് ഉയരുന്നത്.
മുന് വൈസ് ചാന്സലര് ഡോ. കെ.എന്. പണിക്കരുടെ കാലഘട്ടത്തില് കെടിഡിസി യാത്രീനിവാസിനായി സര്വകലാശാല ഭൂമി നല്കിയത് ഏറെ വിവാദമായിരുന്നു. ഓരോ കാര്യങ്ങളുടെ പേരില് സര്വകലാശാല ഭൂമി തരംമാറ്റി ഇല്ലാതാക്കാനുള്ള നീക്കമാണ് നടക്കുന്നത്. ഇപ്പോള് തന്നെ വിവിധ കെട്ടിടങ്ങളുടെ നിര്മാണ പ്രവര്ത്തനങ്ങളും ക്രമക്കേടുകളുമാണ് നടക്കുന്നതെന്ന ആക്ഷേപമുണ്ട്. യുജിസി ഫണ്ട് വാങ്ങി കെട്ടിട നിര്മാണങ്ങള് മാത്രമാണ് ആകെ നടക്കുന്നത്. ഇപ്പോഴത്തെ ഇടപാടിനു പിന്നില് സിപിഎമ്മിന്റെ ഒരു ഉന്നതനാണെന്നാണ് സൂചന. ഇതിനെതിരെ ഗവര്ണര്ക്ക് പരാതി നല്കാന് ഒരുങ്ങുകയാണ് സംസ്കൃത ഭാഷാ സ്നേഹികള്.
ജന്മഭൂമി ഓണ്ലൈന്