ആലുവ : വധശ്രമ കേസ്സ് പ്രതിയെ കാപ്പ ചുമത്തി ജയിലിലടച്ചു. നോർത്ത് പറവൂർ പുത്തൻവേലിക്കര തുരുത്തൂർ കരയിൽ പടമാട്ടുമൽ വീട്ടിൽ റെഫീൻ (26) നെയാണ് കാപ്പ ചുമത്തി വിയ്യൂർ സെൻട്രൽ ജയിലിൽ അടച്ചത്. റൂറൽ ജില്ല പോലീസ് മേധാവി എം.ഹേമലതയുടെ റിപ്പോർട്ടിന്റെ അടിസ്ഥാനത്തിൽ ജില്ലാ കളക്ടർ പ്രിയങ്ക ജി. ആണ് ഉത്തരവിട്ടത് .
പുത്തൻവേലിക്കര പോലീസ് സ്റ്റേഷൻ പരിധിയിൽ കൊലപാതകശ്രമം, കഠിനദേഹോപദ്രവം, അതിക്രമിച്ച് കടക്കൽ, മയക്ക് മരുന്ന് വിൽപ്പന തുടങ്ങി നിരവധി കേസുകളിൽ പ്രതിയായിരുന്നു ഇയാൾ . കഴിഞ്ഞ ജൂലൈ മാസം പുത്തൻവേലിക്കരയിൽ വച്ചുണ്ടായ അടിപിടി കേസിൽ പ്രതിയായതിനെ തുടർന്നാണ് കാപ്പ ചുമത്തിയത് .
പുത്തൻവേലിക്കര പോലീസ് സ്റ്റേഷൻ ഇൻസ്പെക്ടർ സിദ്ദിഖ് അബ്ദുൾ ഖാദറിന്റെ നേതൃത്വത്തിൽ സബ്ബ്. ഇൻസ്പെക്ടർ കെ.ടി ജിജീഷ് , സീനിയർ സിവിൽ പോലീസ് ഓഫീസർ ഇ. ഇ റിയാസ് , സിവിൽ പോലീസ് ഓഫീസർമാരായ ശ്യാംകുമാർ, അനിൽ കുമാർ എന്നിവർ അടങ്ങുന്ന സംഘമാണ് ഇയാളെ അറസ്റ്റ് ചെയ്തത്.
