തിരുവനന്തപുരം: ഡിജിപി യോഗേഷ് ഗുപ്തയ്ക്ക് കേന്ദ്ര ഡെപ്യൂട്ടഷന് വേണ്ടി അഞ്ച് ദിവസത്തിനുള്ളില്‍ വിജിലന്‍സ് ക്ലിയറന്‍സ് സര്‍ട്ടിഫിക്കറ്റ് നല്‍കണമെന്ന് കേന്ദ്ര അഡ്മിനിസ്ട്രേറ്റീവ് ട്രൈബ്യൂണല്‍. കേന്ദ്രം നിരവധി തവണ ആവശ്യപ്പെട്ടിരുന്നെങ്കിലും സംസ്ഥാനം ക്ലിയറന്‍സ് സര്‍ട്ടിഫിക്കറ്റ് നല്‍കിയില്ല.
തുടര്‍ന്നാണ് യോഗേഷ് ഗുപ്ത കേന്ദ്ര അഡ്മിനിസ്ട്രേറ്റീവ് ട്രൈബ്യൂണലില്‍ ഹര്‍ജി നല്‍കിയത്. യോഗേഷ് ഗുപ്തയെ മൂന്നു വര്‍ഷത്തിനിടെ ഒമ്പത് തവണയാണ് സര്‍ക്കാര്‍ സ്ഥലം മാറ്റിയത്. അഞ്ചു വര്‍ഷം സി ബി ഐയിലും ഏഴു വര്‍ഷം എന്‍ഫോഴ്‌സ്‌മെന്റ് ഡയറക്ടറേറ്റിലും (ഇ ഡി) പ്രവര്‍ത്തിച്ച ശേഷം യോഗേഷ് ഗുപ്ത കേരളത്തില്‍ തിരിച്ചെത്തിയത് മൂന്ന് വര്‍ഷം മുന്‍പാണ് .
ബിവറേജസ് കോര്‍പറേഷന്‍, സിവില്‍ സപ്ലൈസ്, വിജിലന്‍സ്, ട്രെയിനിംഗ്, ക്രൈം റെക്കാര്‍ഡ്‌സ് ബ്യൂറോ, ഫയര്‍ ഫോഴ്‌സ്, പൊലീസ് അക്കാഡമി (രണ്ട് വട്ടം) എന്നിങ്ങനെ അടിക്കടി മാറ്റി. റോഡ് സുരക്ഷാ കമ്മിഷണറായാണ് പുതിയ മാറ്റം. ഐ പി എസ് അസോസിയേഷന്‍ പ്രസിഡന്റുമാണ് യോഗേഷ്. നിരന്തര സ്ഥാനമാറ്റങ്ങളില്‍ മനം മടുത്താണ് കേന്ദ്ര സര്‍വീസിലേക്ക് പോകാന്‍ യോഗേഷ് ഗുപത് അപേക്ഷിച്ചത്.
1993 ബാച്ചുകാരനായ യോഗേഷ് ഗുപ്തയ്ക്ക് 2030 ഏപ്രില്‍ വരെ സര്‍വീസുണ്ട്. മുംബയ് സ്വദേശിയാണ്.
