ബെംഗളൂരു: സുങ്കടകട്ടെ ബസ് സ്റ്റാന്‍ഡിന് സമീപം 12 കാരിയായ മകളുടെ മുന്നില്‍ വച്ച് യുവാവ് ഭാര്യയെ കുത്തിക്കൊന്നു. ഹാസന്‍ ചന്നരായപട്ടണയിലെ രേഖ എന്ന 32 കാരിയായ ടെലികോള്‍ സെന്‌റര്‍ ജീവനക്കാരിയാണ് കൊല്ലപ്പെട്ടത്. രേഖയുടെ ശരീരത്തില്‍ 11 കുത്തുകളുണ്ടായിരുന്നുവെന്ന് പൊലീസ് അറിയിച്ചു. സംഭവത്തില്‍ അതേ ഓഫീസിലെ ടാക്‌സി ഡ്രൈവറായ ഭര്‍ത്താവ് ലോഹിതാശ്വയെ പൊലീസ് തിരയുന്നു.
രേഖയും മൂത്ത മകളും റോഡിനു കുറുകെ കടക്കാന്‍ കാത്തുനില്‍ക്കുമ്പോഴാണ് ആക്രമണമുണ്ടായത്. റോഡില്‍ വച്ച് വഴക്കുണ്ടാക്കിയ ലോഹിതാശ്വ പെട്ടെന്ന് കത്തിയെടുത്ത് ആവര്‍ത്തിച്ച് കുത്തുകയായിരുന്നു. മകള്‍ തടയാന്‍ ശ്രമിച്ചുവെങ്കിലും ഫലമുണ്ടായില്ല. ആളുകള്‍ ഓടിയെത്തിയതോടെ ലോഹിതാശ്വ സംഭവസ്ഥലത്ത് നിന്ന് രക്ഷപ്പെട്ടു.
രേഖയ്‌ക്ക് മറ്റൊരാളുമായി അടുപ്പമുണ്ടെന്ന സംശയത്തിലാണ് കൊലപാതകമെന്ന് അറിയുന്നു. രേഖയും ലോഹിതാശ്വയും കുറച്ചുനാളായി ഒരുമിച്ച് താമസിച്ചിരുന്നതായും മൂന്ന് മാസം മുമ്പ് ഒരു ക്ഷേത്രത്തില്‍ വെച്ച് വിവാഹം കഴിച്ചതായും പോലീസ് പറഞ്ഞു.
നേരത്തെ വിവാഹിതയും രണ്ട് കുട്ടികളുടെ അമ്മയുമായിരുന്ന രേഖ ആദ്യ ഭര്‍ത്താവില്‍ നിന്ന് വേര്‍പിരിഞ്ഞിരുന്നു. ലോഹിതാശ്വയും വിവാഹമോചിതയായിരുന്നു. ഇവര്‍ക്ക് രണ്ട് പെണ്‍മക്കളുണ്ട്.
