കൊച്ചി: സിപിഐഎം വനിതാ നേതാവ് കെ ജെ ഷൈനെതിരായ സൈബര്‍ ആക്രമണത്തില്‍ കൊണ്ടോട്ടി അബുവിനെയും പ്രതിചേര്‍ത്തു.
യൂട്യൂബര്‍ കൂടിയായ കൊണ്ടോട്ടി അബുവിനെയാണ് മൂന്നാം പ്രതിയാക്കിയിരിക്കുന്നത്. യൂട്യൂബ് ചാനലിലൂടെ കെ.ജെ. ഷൈനിനെതിരെ ഇയാള്‍ അപവാദ പ്രചാരണം നടത്തിയെന്നതാണ് കുറ്റം.
2024ലെ ലോക്സഭാ തെരഞ്ഞെടുപ്പില്‍ സിപിഎം സ്ഥാനാര്‍ത്ഥിയായി എറണാകുളം മണ്ഡലത്തില്‍ മത്സരിച്ച സിപിഎം വനിതാ നേതാവ് കൂടിയാണ് കെ.ജെ. ഷൈന്‍. കോണ്‍ഗ്രസ് നേതാവ് സി കെ ഗോപാലകൃഷ്ണനാണ് ഒന്നാം പ്രതി. യൂട്യൂബര്‍ കെ എം ഷാജഹാന്‍ രണ്ടാം പ്രതിയാണ്. സ്ത്രീത്വത്തെ അപമാനിക്കുംവിധം സോഷ്യല്‍ മീഡിയയിലൂടെ അപവാദ പ്രചാരണം നടത്തിയെന്ന് ചൂണ്ടിക്കാട്ടിയാണ് ഇവര്‍ക്കെതിരെ കേസെടുത്തത്.
ഒന്നാം പ്രതി സി കെ ഗോപാലകൃഷ്ണന്‍ ഒളിവിലാണ്. ഇയാളുടെ വീട്ടില്‍ പറവൂര്‍ സിഐയുടെ നേതൃത്വത്തിലുള്ള സംഘം പരിശോധന നടത്തിയിരുന്നു.
