കൊച്ചി: ന്യൂനപക്ഷമോര്ച്ച സംസ്ഥാന കമ്മിറ്റിയുടെ നേതൃത്വത്തില് കപ്പിള് കാമ്പയിനിന്റെ സംസ്ഥാനതല ഉദ്ഘാടനം നടന്നു. കേരള കോണ്ഗ്രസ് മാണി വിഭാഗം വൈറ്റില മണ്ഡലം അധ്യക്ഷന് ജെയിംസ് വി.എ., മുന് മണ്ഡലം അധ്യക്ഷന് ജെയിംസ് മാത്യു എന്നിവരടക്കം ന്യൂനപക്ഷ വിഭാഗത്തില്പ്പെട്ട 50 പ്രവര്ത്തകര് ബിജെപി അംഗത്വം സ്വീകരിച്ചു.
ന്യൂനപക്ഷ മോര്ച്ച സംസ്ഥാന അധ്യക്ഷന് സുമിത് ജോര്ജ് അധ്യക്ഷനായി. ബിജെപി സംസ്ഥാന വക്താവ് കെ.വി.എസ്. ഹരിദാസ് ഉദ്ഘാടനം ചെയ്ത് അംഗത്വം വിതരണം ചെയ്തു. നരേന്ദ്ര മോദി സര്ക്കാരിന്റെ വികസന കാഴ്ചപ്പാടും, ന്യൂനപക്ഷങ്ങളോടുള്ള കരുതലും തങ്ങളെ ബിജെപിയിലേക്ക് ആകര്ഷിച്ചതായി അംഗത്വമെടുത്തവര് പ്രതികരിച്ചു. കൊല്ലം പാര്ത്ഥസാരഥി ക്ഷേത്രത്തില് ഓണാഘോഷത്തോടനുബന്ധിച്ച് പൂക്കളം ഇട്ടതില് സെനികരടക്കമുള്ള യുവാക്കള്ക്കെതിരെ കേസെടുത്തതില് ഇടതുവലതു മുന്നണികള് കുറ്റകരമായ മൗനം പാലിക്കുന്നു. ഈ ദേശവിരുദ്ധ നടപടിയില് പ്രതിഷേധിച്ചാണ് ബിജെപിയില് അംഗത്വമെടുത്തത്. ന്യൂനപക്ഷങ്ങളെ ഒന്നായി കാണാതെ സംസ്ഥാനത്ത് ഒരു പ്രത്യേക മതവിഭാഗത്തിനാണ് എല്ലാ സഹായവും നല്കുന്നത്. ഇക്കാര്യത്തില് മുന്നണികള് പരസ്പരം മത്സരിക്കുകയാണ്. ബിജെപിയില് ഇത്തരത്തിലൊരു വേര്തിരിവ് കണ്ടിട്ടില്ലെന്നും സംസ്ഥാനത്ത് പാര്ട്ടിയുടെ ഭരണം വരാനായി ആത്മാര്ത്ഥമായി ആഗ്രഹിക്കുന്നതായും പുതിയതായി അംഗത്വമെടുത്തവര് പ്രതികരിച്ചു.
ന്യൂനപക്ഷമോര്ച്ച അഖിലേന്ത്യ ഉപാധ്യക്ഷന് അഡ്വ. നോബിള് മാത്യു, ബിജെപി സംസ്ഥാന വക്താവ് അഡ്വ. ടി.പി. സിന്ധുമോള്, ജില്ലാ അധ്യക്ഷന് അഡ്വ. കെ.എസ്. ഷൈജു, ജനറല് സെക്രട്ടറിമാരായ എസ്. സജി, ശ്രീക്കുട്ടന് തുണ്ടത്തില്, ന്യൂനപക്ഷമോര്ച്ച സംസ്ഥാന ജനറല് സെക്രട്ടറി ഷൈന് ലാല് എംപി, സംസ്ഥാന ഉപാധ്യക്ഷന്മാരായ ഡെന്നീസ് ജോയ്, ജോസ് എ.വൈ, ഫിലിപ്പ് മുനമ്പം, സംസ്ഥാന സെക്രട്ടറി ലെന്സണ്, സംസ്ഥാന ട്രഷറര് ജോസഫ് ജോണ്, ന്യൂനപക്ഷമോര്ച്ച ജില്ലാ അധ്യക്ഷന് ഡെനീഷ് കെ.ഡി. എന്നിവര് നേതൃത്വം നല്കി.
