തിരുവനന്തപുരം: സ്‌കൂളുകളില്‍ പെണ്‍കുട്ടികളുടെ ഹാജര്‍ ആദ്യം എടുക്കണമെന്ന നിര്‍ദ്ദേശവുമായി വിദ്യാഭ്യാസ മന്ത്രി വി ശിവന്‍കുട്ടി. സംസ്ഥാനത്തെ സ്‌കൂളുകള്‍ക്കുള്ള മന്ത്രിയുടെ അടുത്ത പരിഷ്‌കരണ നിര്‍ദ്ദേശമാണിത്.
അടുത്ത അധ്യായന വര്‍ഷം മുതല്‍ ക്ലാസില്‍ ഹാജര്‍ എടുക്കുമ്പോള്‍ ആദ്യം പെണ്‍കുട്ടികളുടെ പേര് വിളിക്കണമെന്നാണ് മന്ത്രി പറയുന്നത്.
ആണ്‍, പെണ്‍ വേര്‍തിരിവുകള്‍ ഇല്ലാതാക്കണമെന്ന നിര്‍ദേശം സാമൂഹ്യശാസ്ത്രജ്ഞര്‍ മുന്നോട്ടു വയ്‌ക്കുന്ന പുതിയ കാലത്ത് കുട്ടികളില്‍ വളരെ ചെറുപ്പത്തിലേ തന്നെ ഇത്തരമൊരു വേര്‍തിരിവു സൃഷ്ടിക്കുന്നതിലെ പ്രശ്‌നങ്ങള്‍ മന്ത്രി വിശദീകരിച്ചിട്ടില്ല. പല സ്‌കൂളുകളിലും ആണ്‍കുട്ടി, പെണ്‍കുട്ടി എന്ന വേര്‍തിരിവില്ലാതെ അക്ഷരമാലാ ക്രമത്തിലാണ് ഹാജര്‍ വിളിക്കുന്നത്.
സ്‌കൂള്‍ അവധിക്കാലം ജൂണ്‍, ജൂലൈ മാസങ്ങളിലേക്ക് മാറ്റണമെന്ന പ്രായോഗികമാക്കാന്‍ ബുദ്ധിമുട്ടുള്ള നിര്‍ദേശവും അടുത്ത കാലത്ത് ശിവന്‍കുട്ടി മുന്നോട്ടു വച്ചിരുന്നു. ജൂണ്‍, ജൂലൈ മാസങ്ങളില്‍ കനത്ത മഴ കാരണം പലപ്പോഴും ക്ലാസുകള്‍ക്ക് അവധി നല്‍കേണ്ടി വരുന്ന സാഹചര്യം മുന്‍നിര്‍ത്തിയാണ് ഇത്തരമൊരു ചര്‍ച്ചയ്‌ക്ക് തുടക്കമിട്ടിരിക്കുന്നതെന്നും മന്ത്രി അവകാശപ്പെട്ടിരുന്നു.
