ന്യൂദല്‍ഹി: ബീഹാറില്‍ വിതുമ്പിയ മോദിയെ നേരിടാന്‍ സോണിയാഗാന്ധിയെ ഭര്‍ത്താവ് മരിച്ചിട്ടും കുലുങ്ങാത്ത ഇരുമ്പ് വനിതയാക്കി അവതരിപ്പിച്ചുകൊണ്ട് നേരിടാന്‍ കോണ്‍ഗ്രസ്. ഇതിന്റെ ഭാഗമായി സമൂഹമാധ്യമങ്ങളില്‍ കോണ്‍ഗ്രസ് നടത്തിയ കാമ്പയിന്‍ പക്ഷെ തിരിച്ചടിക്കുകയായിരുന്നു.
മോദി രാഷ്‌ട്രീയത്തില്‍ സമഗ്രമായ ഒരു പാക്കേജാണ്. കുട്ടികള്‍ക്കൊപ്പം അദ്ദേഹം ചിരിക്കും. സഹോദരിമാരെ വേദനിപ്പിച്ചാല്‍ അദ്ദേഹം കോപിഷ്ഠനാകുമെന്ന് മാത്രമല്ല, അവര്‍ക്ക് വേണ്ടി ഓപ്പറേഷന്‍ സിന്ദൂര്‍ വരെ നടത്തും. സ്വന്തം അമ്മയെ കോണ്‍ഗ്രസിലെ ചില റൗഡികള്‍ തെറിവിളിച്ചപ്പോള്‍ അദ്ദേഹം ഒരു കുട്ടിയെപ്പോലെ വിതുമ്പുകയും ചെയ്യും. ലോകരാഷ്‌ട്രീയ നേതാക്കള്‍ക്കിടയില്‍ തലയെടുപ്പോടെ നില്‍ക്കുമ്പോള്‍, ആഗോള ബിസിനസ് നേതാക്കളെ മുഴുവന്‍ ഇന്ത്യയിലേക്ക് കൊണ്ടുവരാന്‍ അവിരാമം പരിശ്രമിക്കുന്ന, സെമികണ്ടക്ടറും അപൂര്‍വ്വമൂലകങ്ങളും ആധുനിക ആയുധങ്ങളും കൊണ്ടുവന്ന് ഇന്ത്യയുടെ മുഖം മിനുക്കുന്ന ഈ രാഷ്‌ട്രീയനേതാവിനെ ഇകഴ്‌ത്താന്‍ സോണിയയുടെ ധീരതയെ ഉയര്‍ത്തിപ്പിടിച്ചുകൊണ്ട് കോണ്‍ഗ്രസ് നടത്തിയ നീക്കം പാളി.
സ്വന്തം മകന്റെ വോട്ട് അധികാര്‍ യാത്ര സഭ്യതയുടെ അതിരുകള്‍ ലംഘിച്ചപ്പോള്‍ റൗഡികള്‍ കോണ്‍ഗ്രസിന്റെ സ്റ്റേജ് കയ്യാളുകയായിരുന്നു. മിക്ക സ്റ്റേജുകളിലും ഇതുപോലെ നിലവാരമില്ലാതെ റൗഡികള്‍ മോദിയെ അസഭ്യം പറഞ്ഞിരുന്നു. യാത്ര അവസാനിക്കാറായപ്പോഴാണ് ബിജെപിക്കാര്‍ ഇതിനെതിരെ പ്രതിഷേധിച്ച് ആ റൗഡികളെ നേരിടാന്‍ തുനിഞ്ഞത്. അതോടെ കാര്യങ്ങള്‍ ശാന്തമായി.
ഇപ്പോള്‍ ഈ മകന്റെ തല തിരിഞ്ഞ രാഷ്‌ട്രീയ പ്രവര്‍ത്തനശൈലിയുടെ പേരില്‍ അമ്മയുടെ ധീരത ഉയര്‍ത്തിപ്പിടിച്ച് മോദിയ്‌ക്കെതിരെ പരിച തീര്‍ക്കാന്‍ ശ്രമിക്കുകയാണ് കോണ്‍ഗ്രസ്. സോണിയ മൂന്നാം ലോകരാജ്യമായ, പിന്നാക്കം നില്‍ക്കുന്ന ഇന്ത്യയെ സേവിക്കാന്‍ യൂറോപ്പിലെ ഉന്നതനിലവാരമുള്ള ജീവിതം ഉപേക്ഷിച്ച് ഭര്‍ത്താവിനൊപ്പം ഇവിടെ എത്തിയതാണെന്നതാണ് കോണ്‍ഗ്രസുകാര്‍ ചില പോസ്റ്റുകളില്‍ സോണിയയെ വാഴ്‌ത്തുന്നത്.
ഭര്‍ത്താവ് രാജീവ് ഗാന്ധി മരിച്ചിട്ടും കണ്ണീര്‍വാര്‍ക്കാതെ മക്കള്‍ക്കൊപ്പം നില്‍ക്കുകയും നാഥനില്ലാത്ത കോണ്‍ഗ്രസിനെ മുന്നില്‍ നിന്നും നയിക്കുകയും ചെയ്തു എന്നതാണ് സോണിയയ്‌ക്ക് നല്‍കിയിരിക്കുന്ന മറ്റൊരു വാഴ്‌ത്തല്‍. പ്രതിസന്ധികള്‍ പലതും തരണം ചെയ്തപ്പോള്‍ മോദിയെപ്പോലെ സോണിയ കരഞ്ഞില്ല, ജനങ്ങളുടെ ദയ പിടിച്ചുപറ്റാനും രാഷ്‌ട്രീയനേട്ടത്തിനും വേണ്ടി തന്റെ വേദനകളെ ഉപയോഗിക്കാന്‍ തുനിഞ്ഞില്ല എന്നതാണ് സോണിയയ്‌കില്‍ കോണ്‍ഗ്രസുകാര്‍ കാണുന്ന മറ്റൊരു മഹത്വം.
എന്നാല്‍ കോണ്‍ഗ്രസുകാരുടെ ഈ സോണിയാ വാഴ്‌ത്തലിനെതിരെ ശക്തമായ വിമര്‍ശനങ്ങളും പരിഹാസങ്ങളുമാണ് സമൂഹമാധ്യമങ്ങളില്‍ ഉയരുന്നത്.മോദിയുമായി സോണിയയെ താരതമ്യം ചെയ്യാനേ കഴിയില്ലെന്നും ഒരു നേതാവെന്ന നിലയില്‍ മോദിയുടെ ഏഴയലത്ത് സോണിയയെ നിര്‍ത്താന്‍ സാധിക്കില്ലെന്നും ചിലര്‍ പ്രതികരിയ്‌ക്കുന്നു.
