മുംബൈ: എയര്ബസിന്റെ ഫ്യൂസലേജ് നിര്മ്മിക്കാനുള്ള കരാര് സ്വന്തമാക്കി മഹീന്ദ്ര ആന്റ് മഹീന്ദ്ര. ചരക്ക് വിമാനങ്ങള് നിര്മ്മിക്കുന്ന എയര് ബസ് ലോകത്തിലെ ഏറ്റവും വലിയ വിമാനിര്മ്മാണക്കമ്പനിയാണ്. യൂറോപ്പ് ആസ്ഥാനമായ എയര്ബസിന്റെ എച്ച് 125 എന്ന ഹെലികോപ്റ്ററിന്റെ ഫ്യൂസലേജ് നിര്മ്മിക്കാനുള്ള കരാറാണഅ മഹീന്ദ്ര എയറോ സ്ട്രക്ചേഴ്സ് പ്രൈവറ്റ് ലിമിറ്റഡ് എന്ന കമ്പനിക്ക് ലഭിച്ചത്.
വിമാനത്തിന്റെ പ്രധാന ബോഡിയാണ് ഫ്യൂസലേജ് എന്നറിയപ്പെടുന്നത്. പൈലറ്റ്, യാത്രക്കാര്, കാര്ഗോ എന്നിവയ്ക്കായി ഉപയോഗിക്കുന്ന വിമാനത്തിന്റെ ശരീരഭാഗമാണിത്. ഇതിന്റെ നിര്മ്മാണത്തിലേക്ക് ഒരു ഇന്ത്യന് കമ്പനി എത്തുക എന്നത് നിസ്സാരനേട്ടമല്ല. ഭാവിയില് മഹീന്ദ്ര നടത്താന് പോകുന്ന വന്കുതിപ്പിന്റെ ഭാഗമാണിത്.
പ്രധാന ഫ്യൂസലേജ് നിര്മ്മിക്കാനുള്ള കരാര് ലഭിക്കുക എന്നതിനര്ത്ഥം മെയ്ക്ക് ഇന് ഇന്ത്യയില് എയര്ബസ് പോലുള്ള ലോകത്തിലെ ഏറ്റവും വലിയ വിമാനനിര്മ്മാണക്കമ്പനിക്ക് വിശ്വാസമായി എന്നതാണെന്ന് മഹീന്ദ്ര ആന്റ് മഹീന്ദ്ര ഉടമ ആനന്ദ് മഹീന്ദ്ര പറഞ്ഞു. “രാജ്യത്തെ മെയ്ക്ക് ഇന് ഇന്ത്യ മോഹങ്ങള്ക്ക് അംഗീകാരം കിട്ടി എന്നത് സന്തോഷകരം. ഭാവിയില് ആഗോള വിപണികളിലേക്ക് എത്താന് രാജ്യത്തിനുള്ള കഴിവിന്റെ അംഗീകാരം കൂടിയാണിത്. “- ആനന്ദ് മഹീന്ദ്ര പറയുന്നു.
എയര് ബസും മഹീന്ദ്രയും തമ്മില് ഒട്ടേറെ കരാറുകള് ഉണ്ടാക്കിയിട്ടുണ്ട്. നേരത്തെ എച്ച്130 എന്ന വിമാനത്തിന്റെ പ്രധാന ഫ്യൂസലേജ് നിര്മ്മിക്കാന് മഹീന്ദ്രയ്ക്ക് എയര്ബസ് കരാര് നല്കിയിരുന്നു. ആ വിജയത്തിന്റെ തുടര്ച്ചയാണ് പുതുതായി ലഭിച്ച ഓര്ഡര്.
മഹീന്ദ്ര എയറോ സ്ട്രക്ചേഴ്സിന്റെ ബെംഗളൂരു നിര്മ്മാണകേന്ദ്രത്തിലാണ് എയര്ബസിന്റെ എച്ച് 125, എച്ച് 130 എന്നിവയുടെ ഫ്യൂസലേജ് നിര്മ്മിക്കുക.
