കൊച്ചി: ആര്‍ട്ടിഫിഷ്യല്‍ ഇന്റലിജന്‍സ്(എഐ) രംഗത്ത് ഇന്ത്യയുടെ അടുത്ത ഘട്ട വളര്‍ച്ചയെ നിര്‍വചിക്കുന്ന പദ്ധതിയുമായി റിലയന്‍സ് ഇന്‍ഡസ്ട്രീസ് ലിമിറ്റഡും ആഗോള ടെക് ഭീമന്‍ ഗൂഗിളും. ഇതുമായി ബന്ധപ്പെട്ട് ഇരു കമ്പനികളും തമ്മിലുള്ള പങ്കാളിത്തം കൂടുതല്‍ വ്യാപിപ്പിക്കുന്നു.
ഇന്ത്യയുടെ ഡിജിറ്റല്‍ ഭാവി മുന്‍നിര്‍ത്തി ഇതിനോടകം തന്നെ റിലയന്‍സും ഗൂഗിളും കാര്യമായ നിക്ഷേപം നടത്തി വരുന്നുണ്ട്.ഇന്ത്യയിലെ ദശക്ഷക്കണക്കിന് പേര്‍ക്ക് താങ്ങാവുന്ന നിരക്കില്‍ ഇന്റര്‍നെറ്റ് ലഭ്യത ഉറപ്പുവരുത്തി രാജ്യത്തിന്റെ ഡിജിറ്റല്‍ പരിവര്‍ത്തനത്തിന് കരുത്തു നല്‍കുന്നതായിരുന്നു അത്.
ഇതിന്റെ തുടര്‍ച്ച എന്ന നിലയിലാണ് ഇരുകമ്പനികളും പങ്കാളിത്തം കൂടുതല്‍ വ്യാപിപ്പിക്കുന്നത്. ജിയോയുടെ ഡിജിറ്റല്‍ ശൃംഖലയുമായി ബന്ധിപ്പിച്ച്, പൂര്‍ണമായും ഹരിതോര്‍ജത്തില്‍ അധിഷ്ഠിതമായ അത്യാധുനിക, സുരക്ഷിത എഐ അടിസ്ഥാനസൗകര്യം വികസിപ്പിക്കുകയാണ് പുതിയ പദ്ധതിയിലൂടെ ലക്ഷ്യമിടുന്നത്.
ലോകത്തിലെ ഏറ്റവും വേഗത്തില്‍ വളരുന്ന റീട്ടെയ്ല്‍ ആവാസ വ്യവസ്ഥയെ ശക്തിപ്പെടുത്തുന്നതിന് ആവശ്യമായ സാങ്കേതിക വിദ്യയും സുരക്ഷയും നല്‍കി പിന്തുണയ്‌ക്കുകയാണ് ലക്ഷ്യം. ഗൂഗിള്‍ ക്ലൗഡിന്റെ എല്ലാവിധ മാനദണ്ഡങ്ങളും പാലിച്ചാണ് ജാംനഗറിലെ ക്ലൗഡ് മേഖല വികസിപ്പിക്കുക.
ഗൂഗിള്‍ ക്ലൗഡിന്റെ പിന്തുണയോടെ റിലയന്‍സിന്റെ പ്രവര്‍ത്തനങ്ങള്‍ കൂടുതല്‍ എഐ അധിഷ്ഠിതമായി മാറും. ഇത് കൂടുതല്‍ മികച്ച രീതിയില്‍ നവീകരണം നടത്താനും പ്രവര്‍ത്തനങ്ങള്‍ ആധുനികവല്‍ക്കരിക്കാനും അടിസ്ഥാനസൗകര്യം മെച്ചപ്പെടുത്താനും റിലയന്‍സിന്റെ എല്ലാ ബിസിനസുകള്‍ക്കും സഹായകമാകും. മാത്രമല്ല ജാംനഗറിലെ എഐ ക്ലൗഡ് മേഖലയിലെ ഡിജിറ്റല്‍ അടിസ്ഥാനസൗകര്യം ഉപയോഗപ്പെടുത്തി ഇന്ത്യയിലെ ചെറുകിട സംരംഭങ്ങള്‍ക്കും സ്റ്റാര്‍ട്ടപ്പുകള്‍ക്കും ഡെവലപ്പര്‍മാര്‍ക്കും പൊതുമേഖല കമ്പനികള്‍ക്കുമെല്ലാം എഐ സേവനങ്ങള്‍ ലഭ്യമാക്കാനും റിലയന്‍സ് ഇന്‍ഡസ്ട്രീസിന് സാധിക്കും.
ഇതുമായി ബന്ധപ്പെട്ട് ഗൂഗിള്‍ ക്ലൗഡ് തങ്ങളുടെ ഏറ്റവും ശക്തിയുള്ള എഐ സൂപ്പര്‍ കംപ്യൂട്ടറുള്‍പ്പടെയുള്ള എഐ സംവിധാനങ്ങള്‍ റിലയന്‍സിനായി വിന്യസിക്കും. ജാംനഗറിനെ പ്രധാന മെട്രോകളുമായി ബന്ധിപ്പിക്കുന്ന ഹൈ കപ്പാസിറ്റി ഇന്‍ട്രാ, ഇന്റര്‍ മെട്രോ ഫൈബര്‍ കണക്റ്റിവിറ്റി സംവിധാനങ്ങളും നിലവില്‍ വരും.
