തിരുവനന്തപുരം: രാഹുല്‍ മാങ്കൂട്ടത്തില്‍ പുറത്തുവിട്ടത് പഴയ ശബ്ദ സന്ദേശമെന്ന് ട്രാന്‍സ് വുമണ്‍ അവന്തിക. രാഹുലിനെതിരെ ആരോപണങ്ങള്‍ ഉയരും മുമ്പ് ആഗസ്റ്റ് ഒന്നിനുള്ള ശബ്ദ സന്ദേശമാണിത്.
ഇതേ മാധ്യമ പ്രവര്‍ത്തകനോട് തന്നെയാണ് പിന്നീട് താന്‍ കാര്യങ്ങള്‍ തുറന്നു പറഞ്ഞതെന്നും അവന്തിക പറഞ്ഞു.
ആ സമയങ്ങളില്‍ എല്ലാം തുറന്നുപറയാന്‍ കഴിയുന്ന മാനസികാവസ്ഥ ആയിരുന്നില്ല.പഴയ ശബ്ദ സന്ദേശം ഇപ്പോള്‍ കൊണ്ടുവന്ന് വാദം നടത്തേണ്ട ആവശ്യമില്ലെന്ന് അവന്തിക പറഞ്ഞു. ഗൂഢാലോചനയുടെ ഭാഗമാണ് അവന്തികയുടെ ആരോപണം എന്നായിരുന്നു രാഹുല്‍ പറഞ്ഞത്. എന്നാല്‍ ടെലഗ്രാം വഴി നടത്തിയ ചാറ്റുകളെപ്പറ്റി എന്തുകൊണ്ടാണ് രാഹുല്‍ പറയാത്തതെന്നും താന്‍ ആരുമായും ഗൂഢാലോചന നടത്തിയിട്ടില്ലെന്നുമാണ് അവന്തിക പറയുന്നത്. ആഗസ്റ്റ് ഒന്നിന് മുന്‍പും നിരന്തരം രാഹുലുമായി സംസാരിച്ചിട്ടുണ്ട്. ഈ പഴയ ശബ്ദ സന്ദേശമല്ലാതെ മറ്റുള്ള ചാറ്റുകള്‍ എന്താണ് രാഹുല്‍ പരസ്യമാക്കാത്തതെന്ന് ആനന്തിക ചോദിക്കുന്നു. വാനിഷ് മോഡിലാണ് രാഹുല്‍ സന്ദേശം അയക്കുന്നത്. ഒരിക്കല്‍ സന്ദേശം കണ്ടാല്‍ പിന്നീട് അത് കാണാന്‍ കഴിയില്ല. രാഹുല്‍ ഇപ്പോള്‍ ശബ്ദ സന്ദേശങ്ങള്‍ നിരത്തുന്നത് ഈ ധൈര്യത്തിന്റെ പുറത്താണെന്നും അവന്തിക പറഞ്ഞു.
മാധ്യമ പ്രവര്‍ത്തകനുമായി ചേര്‍ന്നുളള ഗൂഢാലോചനയുടെ ഭാഗമായാണ് അവന്തിക ആരോപണങ്ങള്‍ ഉന്നയിച്ചത് എന്നാണ് രാഹുല്‍ സൂചിപ്പിച്ചത്. എന്നാല്‍, മാധ്യമ പ്രവര്‍ത്തകന്‍ തന്നെ വിളിച്ച് കാര്യങ്ങള്‍ അന്വേഷിക്കുകയായിരുന്നെന്നും അതിനുള്ള മറുപടിയാണ് ആ സമയത്ത് നല്‍കിയതെന്നും അവന്തിക പറഞ്ഞു.
അന്ന് ഒന്നും വെളിപ്പെടുത്താന്‍ പറ്റുന്ന സാഹചര്യമായിരുന്നില്ല. പിന്നീട് അയാളോട് തന്നെ എല്ലാം വെളിപ്പെടുത്തി. മാധ്യമ പ്രവര്‍ത്തകന്‍ കാര്യങ്ങളറിയാന്‍ വിളിച്ചതായി അവന്തിക തന്നെയാണ് രാഹുലിനെ അറിയിച്ചത്. അപ്പോഴത്തെ സംഭാഷണമാണ് രാഹുല്‍ ഇപ്പോള്‍ പുറത്തുവിട്ടിരിക്കുന്നതെന്ന് അവന്തിക പറഞ്ഞു.
