തിരുവനന്തപുരം:രാഹുല്‍ മാങ്കൂട്ടത്തില്‍ എംഎല്‍എയ്‌ക്കെതിരായ വെളിപ്പെടുത്തലിന് പിന്നാലെ സൈബര്‍ ആക്രമണമുണ്ടായതിനെ തുടര്‍ന്ന് എഴുത്തുകാരി ഹണി ഭാസ്‌കര്‍ മുഖ്യമന്ത്രിക്കും ഡിജിപിക്കും പരാതി നല്‍കി. ഇമെയില്‍ ആയാണ് പരാതി അയച്ചത്.
ഡിവൈഎഫ്ഐ നേതാക്കള്‍ക്കും ഇടതുപക്ഷ സഹയാത്രികര്‍ക്കുമൊപ്പം നില്‍ക്കുന്ന ഹണി ഭാസ്‌കറിന്റെ ചിത്രങ്ങള്‍ മോശം തലക്കെട്ടുകളോടെ പ്രചരിപ്പിക്കുകയാണ് കോണ്‍ഗ്രസ് അനുകൂല സാമൂഹ്യ മാധ്യമ ഹാന്‍ഡിലുകള്‍. രാഹുല്‍ മാങ്കൂട്ടത്തില്‍ തന്നോട് സാമൂഹിക മാധ്യമങ്ങളില്‍ ചാറ്റ് ചെയ്ത ശേഷം ഇതേക്കുറിച്ച് മറ്റുള്ള ആളുകളോട് മോശമായി പറഞ്ഞെന്നും എതിര്‍ രാഷ്‌ട്രീയത്തില്‍ ഉള്ളവര്‍ പോലും തന്നോട് ഇങ്ങോട്ട് ചാറ്റ് ചെയ്യാന്‍ വരുന്നു എന്ന് മേനി പറഞ്ഞു എന്നുമാണ് ഹണി ഭാസ്‌കര്‍ ആരോപിച്ചത്.
രാഹുലിന്റെ സ്വഭാവ ദൂഷ്യങ്ങള്‍ ഷാഫി പറമ്പിലിന് അറിയാമെന്നും എന്നാല്‍, അയാളില്‍ എത്തുന്ന പരാതികളൊന്നും എവിടെയും എത്തുന്നില്ലെന്നും ഹണി ഭാസ്‌കര്‍ പറഞ്ഞു. വനിതാ കോണ്‍ഗ്രസ് പ്രവര്‍ത്തകരും രാഹുലിന്റെ ഇരകളാണെന്ന് ഇവര്‍ ആരോപിച്ചിരുന്നു.
