തിരുവനന്തപുരം : ബിവറേജസ് കോര്‍പ്പറേഷന്‍ ജീവനക്കാര്‍ക്ക് റെക്കോര്‍ഡ് ബോണസ്.ബെവ്കോയിലെ സ്ഥിരം ജീവനക്കാര്‍ക്ക് 1,02,500 രൂപ ബോണസ് ലഭിക്കും. വിറ്റുവരവ് അടിസ്ഥാനമാക്കിയാണിത്.
എക്‌സൈസ് മന്ത്രി എം.ബി. രാജേഷിന്റെ നേതൃത്വത്തില്‍ ചേര്‍ന്ന ചര്‍ച്ചയിലാണ് ബോണസ് കാര്യത്തിലെ തീരുമാനം.കഴിഞ്ഞവര്‍ഷം 95,000 രൂപയായിരുന്നു ജീവനക്കാര്‍ക്ക് ബോണസായി നല്‍കിയത്. 4,000 ത്തോളം ജീവനക്കാരാണ് ബോണസിന് അര്‍ഹരായിട്ടുള്ളത്. ഇതിനുപുറമെ കടകളിലെയും ഹെഡ്ക്വാര്‍ട്ടേഴ്‌സിലേയും ക്ലിനിംഗ് സ്റ്റാഫിനും എംപ്ലോയ്‌മെന്റ് സ്റ്റാഫിനും 6000 രൂപ ബോണസ് നല്‍കും. സുരക്ഷാ ജീവനക്കാര്‍ക്ക് 12,500 രൂപ ബോണസ് ആയി ലഭിക്കും.
ഇത്തവണത്തെ വിറ്റുവരവ് 19,700 കോടി രൂപയാണെന്ന് മന്ത്രി എം ബി രാജേഷ് പറഞ്ഞു. കഴിഞ്ഞവര്‍ഷം 19050 കോടി രൂപയായിരുന്നു. ഇത്തവണത്തെ ഓണം വില്‍പ്പനയിലും റെക്കോര്‍ഡ് വരുമാനമാണ് ബെവ്കോ പ്രതീക്ഷിക്കുന്നത്.
