തിരുവനന്തപുരം: ജന്ധന് അക്കൗണ്ടുകള് ആരംഭിച്ച് പത്തുവര്ഷത്തിനുശേഷം റീ കെവൈസി നടപടികള് പൂര്ത്തിയാക്കാത്തതിനാല് 57 ലക്ഷത്തോളം ബാങ്ക് അക്കൗണ്ടുകളിലെ ഇടപാടുകള് തടസപ്പെടും.
2014 മുതല് ആരംഭിച്ച ജന്ധന് യോജന അക്കൗണ്ടുകളില് 90 ശതമാനത്തോളവും റീ കെവൈസി നടപടികള് പൂര്ത്തിയാക്കിയിട്ടില്ല. ഇതിനാല് അക്കൗണ്ടില് എത്തുന്ന സബ്സീഡി തുക ഉപഭോക്താവിന് പിന്വലിക്കാനാകാതെ വരും. ഇതു പരിഹരിക്കാന് ബാങ്കുകള് ഫിനാന്ഷ്യല് ഇന്ക്ലൂഷന് ഫ്ളാഗ്ഷിപ്പ് പദ്ധതികള്ക്കായുള്ള മൂന്ന് മാസത്തെ സാച്ചുറേഷന് കാമ്പെയ്ന് തുടരുന്നു.
പഞ്ചായത്തു തലത്തില് ജൂലൈ ഒന്നു മുതല് ആരംഭിച്ച കാമ്പയ്ന് സെപ്തംബര് 30 വരെ തുടരുമെന്ന് സ്റ്റേറ്റ് ലെവല് ബാങ്കേഴ്സ് കമ്മിറ്റി (എസ്എല്ബിസി) ചെയര്മാനും കാനറ ബാങ്ക് ജനറല് മാനേജറുമായ കെ.എസ്. പ്രദീപ് വാര്ത്താസമ്മേളനത്തില് പറഞ്ഞു. സംസ്ഥാനത്തെ 555 പഞ്ചായത്തുകളില് കാമ്പയ്ന് പൂര്ത്തിയാക്കി. പിഎംജെഡിവൈ അക്കൗണ്ടുകള്ക്കായി 60,593 റീ കെവൈസി പ്രവര്ത്തനങ്ങളും മറ്റ് അക്കൗണ്ട് വിഭാഗങ്ങള്ക്കായി 1,24,081 പ്രവര്ത്തനങ്ങളും പൂര്ത്തിയാക്കി.
ബാങ്ക് ഡിപ്പോസിറ്റുകളില് നോമിനിയെ നിര്ബന്ധമായും ഉള്പ്പെടുത്തിയിരിക്കണമെന്നും നിക്ഷേപകന് മരിച്ചതോടെ അവകാശികളില്ലാതായിത്തീര്ന്ന 67,000 കോടി രൂപ ബാങ്കുകളില് കെട്ടിക്കിടക്കുകയാണെന്നും അദ്ദേഹം പറഞ്ഞു. ഡിജിറ്റല് ഫ്രോഡ് നടപടികളും അക്കൗണ്ട് വാടകയ്ക്കെടുത്ത് കോടികളുടെ കള്ളപ്പണം വെളുപ്പിക്കുന്നവരും യുവാക്കളെ ലക്ഷ്യമിടുന്നു.
അക്കൗണ്ട് വാടകയ്ക്കെടുത്ത് തട്ടിപ്പുനടത്തുന്നവര് പ്രധാനമായും ലക്ഷ്യമിടുന്നത് 18നും 25നും ഇടയില് പ്രായമുള്ള വിദ്യാര്ത്ഥികളെയാണ്. ഇത് തടയാനായി വിദ്യാലയങ്ങള് കേന്ദ്രീകരിച്ച് അധ്യാപകര്ക്കുള്പ്പെടെ ബോധവത്കരണം ശക്തമാക്കുമെന്നും അദ്ദേഹം പറഞ്ഞു.
