വാരണാസി : സ്വന്തം പേരും വിലാസവും മാറ്റി പറഞ്ഞ് വിവിധ സംസ്ഥാനങ്ങളില്‍ നിന്ന് 12 യുവതികളെ വിവാഹം കഴിച്ച ഷറഫ് റിസ്വി അറസ്റ്റില്‍. ഉത്തര്‍പ്രദേശ് ഉള്‍പ്പെടെ മൂന്ന് സംസ്ഥാനങ്ങളിലെ യുവതികളെ ഹിന്ദുവാണെന്ന് പറഞ്ഞ് വിവാഹം കഴിച്ചതിന്റെ രേഖകളാണ് ഇപ്പോള്‍ പൊലീസിന്റെ പക്കലുളളത്.
ഫാറൂഖാബാദ് സ്വദേശിയായ ഷറഫ് റിസ്വിക്ക് നിരവധി ഇസ്ലാമിക ഗ്രൂപ്പുകളുമായി ബന്ധമുണ്ടായിരുന്നുവെന്നും കണ്ടെത്തിയിട്ടുണ്ട്. ഈ ഗ്രൂപ്പകളിലൂടെ ഇയാള്‍ക്ക് ഫണ്ട് ലഭിച്ചിരുന്നെന്നും പൊലീസ് അറിയിച്ചു.
വൈവാഹിക സൈറ്റുകളിലൂടെയാണ് ഷറഫ് റിസ്വി പ്രധാനമായും യുവതികളെ കെണിയില്‍ പെടുത്തിയിരുന്നത്. ഫേസ്ബുക്കിലൂടെ യഥാര്‍ത്ഥ പേര് വെളിപ്പെടുത്തി സൗഹൃദാഭ്യര്‍ത്ഥന നടത്തിയപ്പോള്‍ കൂടുതലും നിരസിക്കപ്പെട്ടെന്ന് ഷറഫ് റിസ്വി പൊലീസിനോട് പറഞ്ഞു.തുടര്‍ന്ന് സമ്രാട്ട് സിംഗ് എന്ന പേരില്‍ പുതിയ പ്രൊഫൈല്‍ സൃഷ്ടിച്ചു. ഇതോടെ യുവതികള്‍ സൗഹൃദാഭ്യര്‍ത്ഥനകള്‍ സ്വീകരിക്കാന്‍ തുടങ്ങി. പിന്നാലെ അജയ് കുമാര്‍, വിജയ് കുമാര്‍ എന്നിങ്ങനെ രണ്ട് വ്യാജ ഐഡികള്‍ കൂടി സൃഷ്ടിച്ചു.
മാട്രിമോണിയല്‍ സൈറ്റുകളിലൂടെ നിരവധി പെണ്‍കുട്ടികളുമായി ബന്ധപ്പെട്ടു.പെണ്‍കുട്ടികളോടും അവരുടെ കുടുംബങ്ങളോടും ഫോണില്‍ സംസാരിച്ചു. കയറ്റുമതിയാണ് തൊഴിലെന്ന് ഇയാള്‍ അവരോട് പറഞ്ഞു. പല നഗരങ്ങളിലും സ്വത്തുക്കളുണ്ടെന്നും വിശ്വസിപ്പിച്ചു.
സ്വന്തം കുടുംബത്തെക്കുറിച്ച് ഷറഫ് റിസ്വി ആരോടും പറഞ്ഞില്ല. ഇടയ്‌ക്കിടെ, ചില സുഹൃത്തുക്കളെ ബന്ധുക്കളെന്ന വ്യാജേന യുവതികളോട് സംസാരിപ്പിച്ചു. വിദൂര സ്ഥലത്താണ് താമസിക്കുന്നതെന്ന് പെണ്‍കുട്ടികളുമായും വീട്ടുകാരുമായും വീഡിയോ കോളിലൂടെ സംസാരിക്കുമ്പോള്‍ പറയും. തുടര്‍ന്ന് അവരെ കാണാന്‍ അവരുടെ വീട്ടിലെത്തി. വിലയേറിയ കാര്‍ വാടകയ്‌ക്കെടുത്താകും പെണ്‍കുട്ടികളുടെ വീട്ടില്‍ പോകുക.
വിവാഹം കഴിക്കാന്‍ താതപര്യമുളളതിനാല്‍ ചില പെണ്‍കുട്ടികളുടെ വീട്ടുകാര്‍ കുറച്ച് ദിവസം അവിടെ താമസിക്കാന്‍ സമ്മതം മൂളും. ഇതിനിടെ പെണ്‍കുട്ടിയുമായി ശാരീരിക ബന്ധവും ഷറഫ് റിസ്വി സ്ഥാപിക്കും.ഇതിനുശേഷം, വിവാഹ ഒരുക്കങ്ങള്‍ക്കെന്ന പേരില്‍ ലക്ഷങ്ങള്‍ വാങ്ങിയ ശേഷം മുങ്ങും. പിന്നീട് പെണ്‍വീട്ടുകാര്‍ക്ക് നല്‍കിയ ഫോണ്‍ നമ്പര്‍ ഉപേക്ഷിക്കും.
ചില വീട്ടുകാര്‍ കല്യാണം നടത്തിയേ പറ്റൂ എന്ന നിര്‍ബന്ധവുമായി പിന്നാലെ കൂടും. അങ്ങനെ ഉളളവരില്‍ നിന്ന് കൂടുതല്‍ പണം ഈടാക്കിയ ശേഷം പിന്നീട് പെണ്‍കുട്ടിയുമായി വഴക്കുണ്ടാക്കി മുങ്ങും. ഇതോടെ പെണ്‍കുട്ടിയുടെ പണവും മാനവും പോയ സ്ഥിതിയാകും.
ഇതിനുശേഷവും വിവാഹത്തിനായി ആരെങ്കിലും വളരെയധികം സമ്മര്‍ദ്ദം ചെലുത്തിയാല്‍, തന്റെ യഥാര്‍ത്ഥ പേരും വിലാസവും ഷറഫ് റിസ്വി വെളിപ്പെടുത്തും.വിവാഹം കഴിക്കാന്‍ ആഗ്രഹിക്കുന്നുവെങ്കില്‍ ഇസ്ലാം മതം സ്വീകരിക്കണമെന്ന് ആവശ്യപ്പെടും. ഇതോടെ മിക്കവാറും എല്ലാ പെണ്‍കുട്ടികളും വിസമ്മതിക്കും. പണം തിരികെ ചോദിച്ചാല്‍ ഭീഷണിപ്പെടുത്തും.
എന്നാല്‍ 12 പെണ്‍കുട്ടികള്‍ മതം മാറി വിവാഹം കഴിക്കാന്‍ തയാറായി.ഈ പെണ്‍കുട്ടികളുടെ വീട്ടുകാരുമായി ബന്ധപ്പെടാനുളള ശ്രമത്തിലാണ് പൊലീസ്. ഇയാള്‍ വഞ്ചിച്ച വാരണാസിയിലെ പെണ്‍കുട്ടി നല്‍കിയ പരാതിയിലാണ് ഇപ്പോള്‍ കുടുങ്ങിയത്.
.
