കണ്ണൂര്‍: മുന്‍ എഡിഎം കെ നവീന്‍ ബാബുവിന്റെ മരണത്തില്‍ തുടരന്വേഷണം വേണം എന്ന കുടുംബത്തിന്റെ ഹര്‍ജി തള്ളണമെന്ന് പൊലീസ് റിപ്പോര്‍ട്ട്.കേസില്‍ സമഗ്ര അന്വേഷണം നടന്നു. അന്വേഷണത്തില്‍ അപാകതയുണ്ടെന്ന കുടുംബത്തിന്റെ വാദം മേല്‍ക്കോടതികള്‍ തള്ളിയതാണെന്നാണ് പൊലീസ് റിപ്പോര്‍ട്ട്.
ആത്മഹത്യ പ്രേരണ നിലനില്‍ക്കും.ബോധപൂര്‍വം ചില മൊഴികള്‍ രേഖപ്പെടുത്തിയില്ലെന്ന നവീന്‍ ബാബുവിന്റെ കുടുംബത്തിന്റെ വാദം തെറ്റെന്നും റിപ്പോര്‍ട്ടില്‍ പറയുന്നു. അന്വേഷണ ഉദ്യോഗസ്ഥന്‍ കണ്ണൂര്‍ ടൗണ്‍ എസ്എച്ച്ഒ ശ്രീജിത്ത് കോടേരി ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയില്‍ സമര്‍പ്പിച്ച റിപ്പോര്‍ട്ടിലാണ് ഇങ്ങനെ പറയുന്നത്. യാത്രയയപ്പിന് ശേഷം കെ നവീന്‍ ബാബു കണ്ണൂര്‍ ജില്ലാ കളക്ടറുടെ ചേംബറില്‍ എത്തി തനിക്ക് തെറ്റ് പറ്റിയെന്ന് പറഞ്ഞെന്നും റിപ്പോര്‍ട്ടില്‍ പറയുന്നു.
നവീന്‍ കൈക്കൂലി വാങ്ങിയെന്ന ആരോപണത്തിന് തെളിവുകളും പൊലീസ് നല്‍കിയ റിപ്പോര്‍ട്ടില്‍ പറയുന്നുണ്ട്. നവീന്‍ ബാബുവും വിവാദ പെട്രോള്‍ പമ്പിന് അപേക്ഷ നല്‍കിയ ടി വി പ്രശാന്തനും നിരവധി തവണ സംസാരിച്ചിട്ടുണ്ടെന്നും പൊലീസ് റിപ്പോര്‍ട്ടില്‍ പറയുന്നു.ഇതിന്റെ സി ഡി ആര്‍ തെളിവ് കുറ്റപത്രത്തില്‍ സമാനമായി തന്നെ പൊലീസ് റിപ്പോര്‍ട്ടിലും ഉണ്ട്.
നവീന്‍ ബാബു പ്രശാന്തനില്‍ നിന്ന് കൈക്കൂലി ആവശ്യപ്പെടുകയും ഇതുമായി ബന്ധപ്പെട്ട് ടി വി പ്രശാന്ത് വിജിലന്‍സിന് പരാതി നല്‍കിയിരുന്നുവെന്നും റിപ്പോര്‍ട്ടില്‍ പറയുന്നുണ്ട്.വിജിലന്‍സിന്റെ കണ്ണൂര്‍ യൂണിറ്റില്‍ ടി വി പ്രശാന്ത് എത്തുന്നതിന്റെ സിസിടിവി ദൃശ്യങ്ങള്‍ പൊലീസിന് കണ്ടെത്താന്‍ കഴിഞ്ഞെന്നും റിപ്പോര്‍ട്ടില്‍ പറയുന്നു.
