അലാസ്ക: ഇന്ത്യയുമായി എങ്ങിനെയെങ്കിലും അടുക്കാന്‍ ട്രംപ് ആഗ്രഹിക്കുന്നതിന്റെ സൂചനകളാണ് അലാസ്കയില്‍ റഷ്യന്‍ പ്രസിഡന്റ് പുടിനുമായുള്ള ചര്‍ച്ചകള്‍ക്കിടയില്‍ പുറത്തുവരുന്നതെന്ന് സൂചനകള്‍. റഷ്യയുടെ പക്കല്‍ നിന്നും എണ്ണ വാങ്ങേണ്ട എന്ന തീരുമാനമൊന്നും ഇന്ത്യ പ്രഖ്യാപിച്ചിട്ടില്ലെങ്കിലും, ഇന്ത്യ റഷ്യയുടെ കയ്യില്‍ നിന്നും എണ്ണ വാങ്ങുന്നത് നിര്‍ത്തി എന്ന അമ്പരപ്പിക്കുന്ന പ്രഖ്യാപനം ട്രംപ് അലാസ്കയില്‍ നടത്തിയത് പ്രധാനമന്ത്രി മോദിയെ വരെ ഞെട്ടിച്ചു. ഇത് ഇനിയും ഇന്ത്യയുമായുള്ള പിണക്കം മുന്നോട്ടുകൊണ്ടുപോയാല്‍ അത് അപകടമാണെന്ന ട്രംപിന്റെ തിരിച്ചറിവാണെന്ന് കരുതുന്നു.
അമേരിക്കന്‍ ഡോളറിനെതിരായി ബ്രിക്സ് കറന്‍സിയെപ്പറ്റി വരെ ഇന്ത്യ ചിന്തിച്ചുതുടങ്ങിയിരിക്കുകയാണ്. മാത്രമല്ല, അമേരിക്കന്‍ ക്രെഡിറ്റ് റേറ്റിംഗ് ഏജന്‍സിയായ സ്റ്റാന്‍ഡേര്‍ഡ് ആന്‍റ് പുവേഴ്സ് വരെ ഇന്ത്യയുടെ ക്രെഡിറ്റ് റേറ്റിംഗ് ഉയര്‍ത്തുക മാത്രമല്ല, ഇന്ത്യയുടെ സാമ്പത്തിക വളര്‍ച്ച 6.5 ശതമാനമായി തുടരുമെന്ന് പ്രഖ്യാപിക്കുകയും ചെയ്തിരുന്നു.
വാസ്തവത്തില്‍ റഷ്യയില്‍ നിന്നും യുഎസില്‍ നിന്നും എണ്ണ വാങ്ങുന്നത് കൂട്ടുകയോ കുറയ്‌ക്കുകയോ ചെയ്യുന്നതിനെക്കുറിച്ച് ഇന്ത്യ യാതൊരു ഔദ്യോഗിക പ്രഖ്യാപനവും ഇതുവരെ നടത്തിയിട്ടില്ല. റഷ്യയില്‍ നിന്നും എണ്ണ വാങ്ങുന്നു എന്ന് വിമര്‍ശിച്ച് ഇന്ത്യയ്‌ക്കെതിരെ യുഎസ് 25 ശതമാനം പിഴ തീരുവ കൂട്ടിയെങ്കിലും ഇന്ത്യ റഷ്യയില്‍ നിന്നും എണ്ണ വാങ്ങുന്നത് കുറച്ചിട്ടില്ലെന്നാണ് ഇന്ത്യന്‍ ഓയില്‍ കോര്‍പറേഷന്‍ ചെയര്‍മാന്‍ അരവിന്ദ് സിങ്ങ് സാഹ്നി കഴിഞ്ഞ ദിവസം പ്രഖ്യാപിച്ചത്. എന്നിട്ടും ഇന്ത്യ റഷ്യയുടെ കയ്യില്‍ നിന്നും എണ്ണ വാങ്ങുന്നത് കുറച്ചുവെന്ന് ട്രംപ് പ്രഖ്യാപിച്ചത് ഇന്ത്യയിലെ രാഷ്‌ട്രീയനേതൃത്വത്തെ അതിശയിപ്പിച്ചു.
റഷ്യയില്‍ നിന്നും ഇന്ത്യ എണ്ണ വാങ്ങുന്നില്ലെന്ന് ട്രംപ് പ്രഖ്യാപിച്ചതോടെ റഷ്യയില്‍ നിന്നും എണ്ണ വാങ്ങുന്നതിന്റെ പേരില്‍ ആഗസ്ത് 27 മുതല്‍ ഇന്ത്യയ്‌ക്കു മേല്‍ ചുമത്താനിരുന്ന 25 ശതമാനത്തോളം അധിക പിഴത്തീരുവ ട്രംപ് കുറച്ചേക്കുമെന്ന് സൂചന. അലാസ്കയില്‍ റഷ്യന്‍ പ്രസിഡന്റ് പുടിനുമായുള്ള ചര്‍ച്ചയിലാണ് ട്രംപ് ഇന്ത്യയ്‌ക്കെതിരെ നിലപാട് മയപ്പെടുത്തിക്കൊണ്ട് പ്രതികരിച്ചത്.
റഷ്യയില്‍ നിന്നും എണ്ണ വാങ്ങുന്നത് ഇന്ത്യ നിര്‍ത്തിയെന്ന് പരസ്യമായി ട്രംപ് പ്രഖ്യാപിക്കുകയായിരുന്നു. ഇതിന്റെ പേരിലാണ് ട്രംപ് ഇന്ത്യയ്‌ക്കെതിരെ ആഗസ്ത് ഏഴ് മുതല്‍ ചുമത്തിയ 25 ശതമാനം തീരുവ ആഗസ്ത് 27 മുതല്‍ 50 ശതമാനമാക്കി ഉയര്‍ത്താന്‍ തീരുമാനിച്ചത്.
എങ്ങിനെയെങ്കിലും ഇന്ത്യയുമായുള്ള ഏറ്റുമുട്ടല്‍ അവസാനിപ്പക്കണമെന്ന നിലപാടിലാണ് ഡൊണാള്‍ഡ് ട്രംപ് എന്നാണ് കരുതുന്നത്. അതിനാലാണ് മിക്കവാറും റഷ്യന്‍ എണ്ണ വാങ്ങുന്നതിന് ഏര്‍പ്പെടുത്തിയ 25 ശതമാനം അധികവ്യാപാരതീരുവ കുറയ്‌ക്കാന്‍ സാധ്യതയുള്ളതായി വിദഗ്ധര്‍ വിലയിരുത്തുന്നത്.
