ന്യൂദല്ഹി: ഭാരതത്തെ വിഭജിച്ചപ്പോഴുണ്ടായ വേദന നാം ഒരിക്കലും മറക്കരുതെന്ന് രാഷ്ട്രപതി ദ്രൗപദി മുര്മു. സ്വാതന്ത്ര്യ ദിനത്തലേന്ന്, വിഭജന ഭീതി ദിനത്തില് രാഷ്ട്രത്തെ അഭിസംബോധന ചെയ്യുകയായിരുന്നു രാഷ്ട്രപതി. രാജ്യ വിഭജനം സൃഷ്ടിച്ച വേദന നാം മറക്കരുത്. നാം വിഭജന ഭീതിയുടെ അനുസ്മരണ ദിനം ആചരിച്ചു. ഭയാനകമായ അക്രമങ്ങള്ക്ക് സാക്ഷ്യം വഹിച്ച ,വിഭജനം മൂലം ദശലക്ഷക്കണക്കിന് ആളുകള് പലായനം ചെയ്യാന് നിര്ബന്ധിതരായ ദിനം. ചരിത്രപരമായ വിഡ്ഢിത്തത്തിന് ഇരകളായിത്തീര്ന്നവര്ക്ക് നാം ആദരാഞ്ജലി അര്പ്പിക്കണം.
ഇന്ന് ത്രിവര്ണ പതാകയെ വന്ദിക്കുമ്പോള്, 78 വര്ഷം മുമ്പ് ആഗസ്ത് 15 ന് നമുക്ക് സ്വാതന്ത്ര്യം നേടിത്തരാന് ത്യാഗമനുഷ്ഠിച്ച എല്ലാ സ്വാതന്ത്ര്യ സമര സേനാനികളുടെയും സ്മരണകള്ക്ക് മുന്നില് നാം ശ്രദ്ധാഞ്ജലി അര്പ്പിക്കണം.
സ്വാതന്ത്ര്യശേഷം, സാര്വത്രിക പ്രായപൂര്ത്തി വോട്ടവകാശമുള്ള ജനാധിപത്യ രാജ്യമായി മാറി. ജനാധിപത്യത്തിന്റെ മാതാവായി രാജ്യം ഇന്ന് അംഗീകരിക്കപ്പെട്ടു. ഭരണഘടനയെയും ജനാധിപത്യത്തെയും മറ്റെല്ലാറ്റിനേക്കാളും നാം വിലമതിക്കുന്നു. ഇന്ന് നാം സമസ്ത മേഖലകളിലും അസാധാരണമായ പുരോഗതി കൈവരിച്ചു. സ്വാശ്രയ രാഷ്ട്രമായി മാറാനുള്ള പാതയില്, വലിയ ആത്മവിശ്വാസത്തോടെ മുന്നേറുകയാണ്. കഴിഞ്ഞ സാമ്പത്തിക വര്ഷം 6.5 ശതമാനം വളര്ച്ചാ നിരക്കോടെ, ലോകത്തിലെ പ്രധാന സമ്പദ്വ്യവസ്ഥകളില് ഏറ്റവും വേഗത്തില് വളരുന്ന രാജ്യമായി ഭാരതം മാറി. പണപ്പെരുപ്പം നിയന്ത്രണവിധേയമാണ്. കയറ്റുമതി ഉയരുകയാണ്. എല്ലാ പ്രധാന സൂചകങ്ങളും സമ്പദ്വ്യവസ്ഥ മുന്നേറുകയാണെന്ന് കാണിക്കുന്നു. സദ്ഭരണത്തിലൂടെ വലിയൊരു വിഭാഗം ജനങ്ങളെ ദാരിദ്ര്യത്തില് നിന്ന് മോചിപ്പിക്കാനായി.
വിവിധ രംഗങ്ങളില് നാം നേടിയ പുരോഗതി വരച്ചുകാട്ടിയ രാഷ്ട്രപതി ലോകത്തെ ഏറ്റവും വലിയ ആരോഗ്യ പരിരക്ഷാ പദ്ധതിയായ ആയുഷ്മാന് ഭാരത്വഴി 55 കോടിയിലധികം പേര്ക്ക് ഇന്ഷുറന്സ് പരിരക്ഷ നല്കിയതായി ചൂണ്ടിക്കാട്ടി. ലോകത്തെ ആകെ ഡിജിറ്റല് പണമിടപാടുകളുടെ പകുതിയിലേറെയും ഭാരതത്തിലാണ്. 2047-ഓടെ രാജ്യം ആഗോള എഐ കേന്ദ്രമായി മാറും. രാജ്യത്തെ പെണ്മക്കള് പ്രതിരോധം, സുരക്ഷ തുടങ്ങിയ മേഖലകളിലടക്കം എല്ലാ രംഗങ്ങളിലും മികവ് കാട്ടുന്നുണ്ട്. തൊഴിലിലെ ലിംഗവ്യത്യാസവും കുറഞ്ഞുവരികയാണ്.
കശ്മീരില് അവധി ആഘോഷിക്കാനെത്തിയ നിരപരാധികളായ പൗരന്മാരെ കൊലപ്പെടുത്തിയത് ഭീരുത്വപരവും അങ്ങേയറ്റം മനുഷ്യത്വരഹിതവുമായ സംഭവമായിരുന്നു. നാം ദൃഢനിശ്ചയത്തോടെ കൃത്യമായി പ്രതികരിച്ചു. രാഷ്ട്രത്തെ സംരക്ഷിക്കാന് ഏത് സാഹചര്യത്തെയും നേരിടാന് നമ്മുടെ സായുധ സേന സജ്ജമാണെന്ന് ഓപ്പറേഷന് സിന്ദൂര് തെളിയിച്ചു. പ്രതിരോധ മേഖലയിലെ ആത്മനിര്ഭര് ഭാരത് ദൗത്യത്തിന്റെ പരീക്ഷണ സംഭവം കൂടിയായിരുന്നു ഓപ്പറേഷന് സിന്ദൂര്, രാഷ്ട്രപതി ചൂണ്ടിക്കാട്ടി.
