ന്യൂദല്‍ഹി: തെരുവ് നായ്‌ക്കള്‍ക്ക് വേണ്ടി വന്‍കാമ്പയിന്‍ അഴിച്ചുവിടുകയാണ് പെറ്റ ഉള്‍പ്പെടെയുള്ള മൃഗസ്നേഹസംഘടനകള്‍. മൃഗങ്ങളെ സ്നേഹിക്കുന്നതിന്റെ പേരില്‍ വിദേശത്ത് നിന്നും കോടികളുടെ ഫണ്ട് വാങ്ങുന്ന സംഘടനകള്‍ക്ക് തെരുവില്‍ നായ്‌ക്കളുണ്ടെങ്കിലേ ഫണ്ട് കിട്ടൂ. അതുകൊണ്ട് തന്നെ സിനിമാതാരങ്ങളേയും രാഷ്‌ട്രീയനേതാക്കളെയും ഉപയോഗിച്ച് തെരുവ് നായ്‌ക്കള്‍ക്ക് അനുകൂലമായ പ്രസ്താവനകളും ഉണ്ടാക്കി സമൂഹമാധ്യമങ്ങളില്‍ അരങ്ങ് തകര്‍ക്കുകയാണ് മൃഗസ്നഹികളായ സംഘടനകള്‍.
എന്നാല്‍ ദല്‍ഹി പൊലീസ് രണ്ടംഗ സുപ്രീംകോടതി ബെഞ്ചിന്റെ വിധി നടപ്പാക്കാന്‍ ശക്തമായി രംഗത്തിറങ്ങിയിട്ടുണ്ട്. തെരുവ് നായ്‌ക്കളെ നീക്കം ചെയ്യാന്‍ വരുന്ന ജീവനക്കാരെ തടയാന്‍ ശ്രമിക്കുന്ന മൃഗസ്നേഹികളെ വേണ്ടിവന്നാല്‍ അറസ്റ്റ് ചെയ്ത് നീക്കാനും ദല്‍ഹി പൊലീസ് രംഗത്തുണ്ട്. ദല്‍ഹിയിലെ തെരുവ് നായ്‌ക്കളെ പിടികൂടാന്‍ വരുന്ന തൊഴിലാളികളെ തടയാന്‍ ശ്രമിക്കുന്ന ഏത് മൃഗസ്നേഹിയെയും അറസ്റ്റ് ചെയ്ത് നീക്കാമെന്ന് സുപ്രീംകോടതി രണ്ടംഗ ബെഞ്ച് കഴിഞ്ഞ ദിവസം വിധിച്ചിരുന്നു.
ഈ പശ്ചാത്തലത്തില്‍ കര്‍ണ്ണാടകയിലെ ജെഡിഎസ് എംഎല്‍എ പറഞ്ഞ ചില വാക്കുകള്‍ കണ്ണുതുറപ്പിക്കുന്ന ഒന്നാണ്. “കാറിലും മറ്റും പോകുന്ന ജഡ്ജിമാരെയും മന്ത്രിമാരേയും തെരുവ് നായ്‌ക്കളുടെ പ്രശ്നം ബാധിക്കില്ല. എന്നാല്‍ കാല്‍നടയായി സ്കൂളില്‍ പോകുന്ന കുട്ടികളെയാണ് തെരുവ് നായപ്രശ്നം ബാധിക്കുക.” – ഇതാണ് ജനതാദള്‍ (എസ്) എംഎല്‍എ പറഞ്ഞത്. പക്ഷെ മൃഗസ്നേഹികളായ സംഘടനകളും പ്രതിപക്ഷരാഷ്‌ട്രീയപാര്‍ട്ടികളും ഇത് എന്തോ മോദി സര്‍ക്കാരിന്റെ ഗൂഢാലോചനയാണ് എന്ന മട്ടിലാണ് കോടതി വിധിക്കെതിരെ പ്രതികരിക്കുന്നത്. നടിമാരായ ജയാ ബച്ചന്‍, ശര്‍മ്മിള ടാഗോര്‍ എന്നിവര്‍ തെരുവ് നായ്‌ക്കള്‍ക്ക് വേണ്ടി ശക്തമായി സമൂഹമാധ്യമങ്ങളില്‍ പ്രതികരിക്കുന്നുണ്ട്.
തെരുവ് നായ്‌ക്കളെ പിടികൂടാന്‍ എത്തുന്ന ജീവനക്കാര്‍ക്കെതിരെ ജീവന്മരണപോരാട്ടമായി രംഗത്തിറങ്ങിയിരിക്കുകയാണ് മൃഗസ്നേഹികള്‍. കാരണം അവര്‍ക്ക് തെരുവ് നായ്‌ക്കളെ കാട്ടിക്കൊടുത്തിട്ട് വേണം സംഘടനയുടെ പ്രവര്‍ത്തനത്തിന് വേണ്ട ഫണ്ട് സംഘടിപ്പിക്കാന്‍ എന്ന് ചിലര്‍ വിമര്‍ശനമുന്നയിക്കുന്നു. ദല്‍ഹിയില്‍ മൂന്ന് ലക്ഷം തെരുവ് നായ്‌ക്കളുണ്ടെന്നും അവയെ പുനരധിവസിപ്പിക്കുന്നതിന് മാസം 5 കോടി വേണ്ടിവരും എന്നാണ് മേനക ഗാന്ധി വിമര്‍ശിക്കുന്നത്. പക്ഷെ എത്ര ലക്ഷം തെരുവ് നായ്‌ക്കളുണ്ടെങ്കിലും അവയെ പുനരധിവസിപ്പിക്കുമെന്നാണ് ദല്‍ഹി മുഖ്യമന്ത്രി രേഖാ ഗുപ്ത പ്രഖ്യാപിച്ചിരിക്കുന്നത്.
