തിരുവനന്തപുരം: സ്കൂളുകളിലെ ആഘോഷദിനങ്ങളില് കുഞ്ഞുങ്ങള്ക്ക് യൂണിഫോം നിര്ബന്ധമാക്കില്ലെന്ന് വിദ്യാഭ്യാസ മന്ത്രി വി. ശിവന്കുട്ടി. വര്ണ പൂമ്പാറ്റകളായി കുഞ്ഞുങ്ങള് പറന്നു രസിക്കട്ടെയെന്നും കുഞ്ഞുങ്ങളുടെ തന്നെ ആവശ്യപ്രകാരമാണ് തീരുമാനമെന്നും മന്ത്രി ഫെയ്സ് ബുക്കില് കുറിച്ചു. തൃശൂരില് നടന്ന സംസ്ഥാന സ്കൂള് കലോത്സവ സ്വാഗതസംഘ രൂപീകരണ യോഗത്തിലും ഇക്കാര്യം പ്രഖ്യാപിച്ചു.
അതേസമയം മന്ത്രിയുടെ തീരുമാനത്തിനെ അനുകൂലിച്ചും പ്രതികൂലിച്ചും നിരവധിപേര് രംഗത്തെത്തി. പഠിക്കുന്ന എല്ലാ പൂമ്പാറ്റകള്ക്കും പറന്നു കളിക്കാന് പറ്റുന്ന കളര് ഡ്രസ് ഉണ്ടാകണമെന്നില്ല സഖാവേ, മറ്റുള്ള കുട്ടികള് കളര് ഡ്രസ് ഇട്ട് പറന്നു കളിക്കുമ്പോള് അതില്ലാത്തവന്റെ അവസ്ഥ അനുഭവിച്ചിട്ടുള്ളതാണ്, അവര്ക്കുണ്ടാകുന്ന അപകര്ഷകതാബോധവും മാനസിക സംഘര്ഷവും കൂടി സര്ക്കാര് മനസിലാക്കണമെന്ന് സോഷ്യല് മീഡിയ കമന്റില് പറയുന്നു. യൂണിഫോമില്ലാതെ കളര്ഡ്രസില് പൂമ്പാറ്റ ക്ലാസ് കട്ട് ചെയ്ത് കറങ്ങാന് പുറത്തേക്ക് പറന്നാല് തിരിച്ചറിയാനാകില്ലെന്നാണ് രസകരമായ ഒരുപ്രതികരണം.
പണം ഉള്ളവന്റെ കുട്ടികളും ഇല്ലാത്തവന്റെ കുട്ടികളും തുല്യം എന്ന മാനദണ്ഡം അനുസരിച്ചാണ് യൂണിഫോമെന്നും ഉള്ളവന്റെ കുട്ടികള് നല്ല ഡ്രസ് ഇട്ടു വരുമ്പോള് മറ്റുള്ളവര്ക്ക് അതൊരു സങ്കടമാവരുതെന്ന് വിചാരിച്ചിട്ടായിരുന്നു യൂണിഫോമിന് പ്രാധാന്യം കൊടുത്തത്. അതുപോലെ കുട്ടികള് സ്കൂളിലേക്ക് വന്നാല് അലഞ്ഞുതിരിഞ്ഞു നടക്കുന്നത് എവിടെയെങ്കിലും കണ്ടാല് തിരിച്ചറിയുന്നതിനും കൂടിയാണെന്നാണ് മറ്റൊരു കമന്റ്. സ്പോര്ട്സ്, ആര്ട്സ് നടക്കുമ്പോള് കുട്ടികളുടെ സുരക്ഷയ്ക്ക് വേണ്ടിയാണ് യൂണിഫോം നിര്ബന്ധമാക്കുന്നത്. യൂണിഫോമില് വീട്ടില് നിന്നും ഇറങ്ങുന്ന കുട്ടിക്ക് കിട്ടുന്ന സുരക്ഷിതത്വം നിറങ്ങളില് കിട്ടില്ലെന്നുമാണ് മറ്റൊരു പ്രതികരണം.
