പട്‌ന: ബിഹാറില്‍ നിന്ന് വ്യാജ സര്‍ട്ടിഫിക്കറ്റുകളുടെ വാര്‍ത്തകള്‍ പുറത്തുവരുന്നതിനിടെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പേരിലും താമസ സര്‍ട്ടിഫിക്കറ്റിന് ഓണ്‍ലൈന്‍ അപേക്ഷ. പടോരി സബ് ഡിവിഷനില്‍ മൊഹിയുദ്ദീന്‍ നഗര്‍ സോണ്‍ ഓഫീസിലാണ് അപേക്ഷ ലഭിച്ചത്. ഡൊണാള്‍ഡ് ട്രംപ്, പതിമൂന്നാം വാര്‍ഡ്, ബക്കര്‍പുര്‍ പി.ഒ., മൊഹിയുദ്ദീന്‍ നഗര്‍, സമസ്തിപുര്‍, ബിഹാര്‍ എന്നായിരുന്നു മേല്‍വിലാസം. ജൂലൈ 29നാണ് ട്രംപിന്റെ പേരില്‍ അജ്ഞാതനായ വ്യക്തി വ്യാജ അപേക്ഷ സമര്‍പ്പിച്ചത്. അപേക്ഷയില്‍ ട്രംപിന്റെ ഫോട്ടോയാണ് നല്കിയിരിക്കുന്നത്.
എന്നാല്‍ മറ്റാരുടേയോ ആധാര്‍ നമ്പര്‍ തിരുത്തിയാണ് അപേക്ഷ നല്കിയിരിക്കുന്നത്. സംഭവത്തില്‍ സൈബര്‍ ക്രൈം വിഭാഗം പരിശോധന ആരംഭിച്ചിട്ടുണ്ട്. ഓണ്‍ലൈന്‍ സംവിധാനത്തെ തെറ്റായ കാര്യങ്ങള്‍ക്ക് ഉപയോഗിക്കുന്നത് ഗൗരവത്തോടെയാണ് കാണുന്നതെന്നും അധികൃതര്‍ വ്യക്തമാക്കി. സമാനമായ രീതിയില്‍ മറ്റ് പല വ്യാജ അപേക്ഷകളും ലഭിക്കുന്നുണ്ട്. എന്നാല്‍ ട്രംപിന്റെ താമസ സര്‍ട്ടിഫിക്കറ്റിനുള്ള അപേക്ഷയാണ് ഇപ്പോള്‍ സാമൂഹ്യ മാധ്യമങ്ങളില്‍ വൈറലാകുന്നത്. ഓണ്‍ലൈന്‍ പോര്‍ട്ടല്‍ ഇത്തരത്തില്‍ ദുരുപയോഗം ചെയ്യുന്നത് ആശങ്ക ഉണ്ടാക്കുന്നതാണെന്ന് അധികൃതര്‍ പറഞ്ഞു. ഐടി നിയമം അനുസരിച്ച് ഗുരുതരമായ കുറ്റമാണിതെന്നും സൈബര്‍ പോലീസില്‍ പരാതി നല്കിയിട്ടുണ്ടെന്നും മൊഹിയുദ്ദീന്‍ നഗര്‍ സര്‍ക്കിള്‍ ഓഫീസര്‍ ബ്രിജേഷ് കുമാര്‍ ദ്വിവേദി പറഞ്ഞു.
