തിരുവനന്തപുരം: കേരളത്തില് വളരെ ചെറിയ കാര്യങ്ങളെപ്പോലും പെരുപ്പിച്ച് കാണിക്കുന്ന പ്രവണത മാധ്യമങ്ങല്ക്കുണ്ടെന്ന് ധനമന്ത്രി കെ.എന്.ബാലഗോപാല്. ഛത്തീസ്ഗഢില് കന്യാസ്ത്രീകള് അറസ്റ്റിലായ ആ സംഭവം കേരളത്തിന്റെ കാഴ്ചപ്പാടിലൂടെയല്ല ഉത്തരേന്ത്യന് സംസ്ഥാനങ്ങളില് കാണുന്നത്.അവിടെ അതൊരു വാര്ത്ത അല്ലായിരുന്നു.കേരള മീഡിയ അക്കാദമിയുടെ മാധ്യമ പ്രതിഭാ സംഗമവും നവീകരിച്ച വെബ്സൈറ്റിന്റെ ഉദ്ഘാടനവും തിരുവനന്തപുരത്ത് നിര്വഹിച്ചു സംസാരിക്കുകയായിരുന്നു അദ്ദേഹം. കേരളം മാധ്യമ സ്വാതന്ത്ര്യത്തില് മുന്നിലാണെന്ന് മന്ത്രി പറഞ്ഞു.
ജനാധിപത്യത്തില് മാധ്യമങ്ങള് ശക്തമായി നില്ക്കണമെന്ന അഭിപ്രായമാണ് കേരള സര്ക്കാരിനുള്ളത്.മെട്രോ റെയില് നിര്മ്മാണം കാരണം കേരള മീഡിയ അക്കാദമിയുടെ നിലവിലുളള കെട്ടിടം നഷ്ടപ്പെടുന്നതിനാല് പുതിയ കെട്ടിട നിര്മ്മാണത്തിന് അടിയന്തര സഹായവും പിന്തുണയുമുണ്ടാകുമെന്നും മന്ത്രി കൂട്ടിച്ചേര്ത്തു.
ഫെലോഷിപ്പ് ജേതാക്കള്ക്കുളള മെമന്റോയും അക്കാദമി നടത്തിയ വാര്ത്താ അവതരണ മത്സര വിജയികള്ക്കുളള സമ്മാനവും മന്ത്രി നല്കി
ഇതിനോടനുബന്ധിച്ച് ഒരു ദിവസശില്പശാലയും സംഘടിപ്പിച്ചു. ഡോ.പി.കെ.രാജശേഖരനായിരുന്നു ശില്പശാല ഡയറക്ടര്. ജേക്കബ് പുന്നൂസ് ഐപിഎസ്, എഐ സ്പെഷ്യലിസ്റ്റ് ഷിജു സദന് എന്നിവര് ക്ലാസുകള് നയിച്ചു.
കേരള മീഡിയ അക്കാദമി ചെയര്മാന് ആര്.എസ്.ബാബു അധ്യക്ഷനായി. അക്കാദമി സെക്രട്ടറി അനില് ഭാസ്കര് സ്വാഗതം പറഞ്ഞു. വൈസ് ചെയര്മാന് ഇ എസ് സുഭാഷ്, കേരള പത്രപ്രവര്ത്തക യൂണിയന് ജില്ലാ പ്രസിഡന്റ് ഷില്ലര് സ്റ്റീഫന്, കേരള പത്രപ്രവര്ത്തക യൂണിയന് സംസ്ഥാന കമ്മിറ്റി അംഗം സുരേഷ് വെള്ളിമംഗലം, കേരള ഗവര്ണറുടെ അഡീഷണല് പ്രൈവറ്റ് സെക്രട്ടറി പി.ശ്രീകുമാര്, കാര്ട്ടൂണിസ്റ്റ് സുധീര്നാഥ് എന് ബി, ജിഷ ജയന്, സൂരജ് ടി എന്നിവര് സംസാരിച്ചു
