തിരുവനന്തപുരം: കേരള-തമിഴ്‌നാട് വനമേഖലകളിലായി ഈ വര്‍ഷം ഏപ്രില്‍ മാസത്തില്‍ നടത്തിയ വരയാടുകളുടെ സംയുക്ത കണക്കെടുപ്പ് റിപ്പോര്‍ട്ട് വനം മന്ത്രി എ.കെ. ശശീന്ദ്രന്‍ വനം വകുപ്പ് മേധാവി രാജേഷ് രവീന്ദ്രന് കൈമാറി പ്രകാശനം ചെയ്തു. റിപ്പോര്‍ട്ട് പ്രകാരം ആകെ 2668 എണ്ണം വരയാടുകളാണ് ഉള്ളത്. ഇതില്‍ 1365 എണ്ണം കേരളത്തിലും 1303 എണ്ണം തമിഴ്‌നാട്ടിലുമാണ്.
ഇരവികുളം നാഷണല്‍ പാര്‍ക്കാണ് സംസ്ഥാനത്തെ ഏറ്റവും കൂടുതല്‍ വരയാടുകള്‍ കാണപ്പെടുന്ന സ്ഥലം. ഇവിടെ 2024ലെ കണക്കില്‍ 827 എണ്ണം വരയാടുകളായിരുന്നത് ഇത്തവണ 841 ആയി വര്‍ധിച്ചു.
കേരളത്തില്‍ 89ഉം തമിഴ്‌നാട്ടില്‍ 182ഉം ഇടങ്ങളിലാണ് കണക്കെടുപ്പ് നടന്നത്. തിരുവനന്തപുരം മുതല്‍ വയനാട് വരെ വരയാടുകള്‍ കാണപ്പെടുന്ന 19 വനം ഡിവിഷനുകളെയാണ് കണക്കെടുപ്പില്‍ ഉള്‍പ്പെടുത്തിയത്. കേരളത്തിലെ വരയാടുകളുടെ ഭൂരിഭാഗവും മൂന്നാര്‍ ലാന്‍ഡ്‌സ്‌കേപ്പിലാണ് കാണപ്പെടുന്നത്.
തമിഴ്‌നാട്ടില്‍ മുക്കൂര്‍ത്തി നാഷണല്‍ പാര്‍ക്കിലും കേരളത്തോട് ചേര്‍ന്നു കിടക്കുന്ന ഗ്രാസ്ഹില്‍സ് നാഷണല്‍ പാര്‍ക്കിലുമാണ് കൂടുതലായി വരയാടുകളെ കണ്ടെത്തിയിട്ടുള്ളത്.
റിപ്പോര്‍ട്ട് പ്രകാശന ചടങ്ങില്‍ ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍, ചീഫ് ഫോറസ്റ്റ് കണ്‍സര്‍വേറ്റര്‍ പ്രമോദ് പി.പി, മൂന്നാര്‍ വൈല്‍ഡ് ലൈഫ് വാര്‍ഡന്‍ ഹരികൃഷ്ണന്‍ കെ.വി, ഇരവികുളം അസിസ്റ്റന്റ് വാര്‍ഡന്‍ നിതിന്‍ലാല്‍ എന്നിവര്‍ പങ്കെടുത്തു.
