മുംബൈ: ദിഗന്തര എന്ന സ്റ്റാര്‍ട്ടപ് കമ്പനിയില്‍ മുകേഷ് അംബാനി 430 കോടി രൂപ മുതല്‍ മുടക്കുകയാണ്. ഇത് ബെംഗളൂരു ആസ്ഥാനമായി പ്രവര്‍ത്തിക്കുന്ന ബഹിരാകാശടെക്നോളജി കമ്പനിയാണ് ദിഗന്തര. സ്റ്റാര്‍ട്ടപ് രംഗത്ത് ഏറെ മൂല്യം കൊണ്ടുവരാന്‍ സാധ്യതയുള്ളവയാണ് ബഹിരാകാശ ടെക്നോളജി കമ്പനികള്‍ എന്ന് വിലയിരുത്തപ്പെടുന്നു. ഇതാണ് ഇത്തരമൊരു കമ്പനിയില്‍ മുതല്‍മുടക്കാന്‍ അംബാനിയെ പ്രേരിപ്പിക്കുന്നത്.
ഭൂമിയുടെ ഭ്രമണപഥത്തിലുള്ള വസ്തുക്കളെ അടയാളപ്പെടുത്തുന്ന സേവനം നല്‍കുന്ന കമ്പനിയാണ് ദിഗന്തര. ഇതിന് ഏറെ ഭാവിയുണ്ടെന്ന് മുകേഷ് അംബാനി വിശ്വസിക്കുന്നു. സ്പേസ് ടെക് നോളജി രംഗത്ത് പ്രവര്‍ത്തിക്കുന്ന നിരവധി കമ്പനികളെ മുകേഷ് അംബാനിയുടെ റിലയന്‍സ് വിശകലനം ചെയ്തിരുന്നു. ഈ രംഗത്ത് പുതിയ പരിഹാരങ്ങള്‍ നല്‍കുന്ന കമ്പനികളെയാണ് മുകേഷ് അംബാനി അന്വേഷിച്ചിരുന്നത്. ദിഗന്തരയ്‌ക്ക് അതിന് സാധിക്കുമെന്ന് അംബാനി വിലയിരുത്തിയതിന്റെ അടിസ്ഥാനത്തിലാണ് ഇത്രയും വലിയ ഒരു തുക മുടക്കാന്‍ തീരുമാനിക്കുന്നതെന്ന് പറയുന്നു.
2025 മാര്‍ച്ചില്‍ ദിഗന്തര ഒരു ഉപഗ്രഹം വിക്ഷേപിച്ചിരുന്നു. അഞ്ച് സെന്‍റിമീറ്റര്‍ വരെ വലിപ്പമുള്ള വസ്തുക്കള്‍ കണ്ടെത്താന്‍ കഴിവുള്ളതാണ് ഈ ഉപഗ്രഹം. ഇപ്പോള്‍ ഇന്ത്യയുടെയും യുഎസിന്റെയും പ്രതിരോധമേഖലയ്‌ക്കാണ് ദിഗന്തര സേവനം നല്‍കിവരുന്നത്. അനിരുദ്ധ് ശര്‍മ്മ (സിഇഒ), രാഹുല്‍ റാവത്ത് (സിഒഒ), തന്‍വീര്‍ അഹമ്മദ് (സിടിഒ) എന്നിവരാണ് ദിഗന്തരയുടെ തലപ്പത്തുള്ളവര്‍.
