ന്യൂദൽഹി : തിങ്കളാഴ്ച ദൽഹി മൃഗശാലയിൽ സന്തോഷത്തിന്റെ അന്തരീക്ഷമായിരുന്നു. ബംഗാൾ ഇനത്തിൽപ്പെട്ട അദിതി എന്ന പെൺ കടുവ ഒരേസമയം ആറ് കുഞ്ഞുങ്ങൾക്ക് ജന്മം നൽകി. കഴിഞ്ഞ 20 വർഷത്തിനിടെ മൃഗശാലയുടെ ചരിത്രത്തിൽ ആദ്യമായാണ് ഒരു ദിവസം ഇത്രയധികം കുഞ്ഞുങ്ങൾ ജനിക്കുന്നത്.
രാവിലെ 9 മണിക്കും 11 മണിക്കും ഇടയിലാണ് ഏഴ് വയസ്സുള്ള അദിതി എന്ന പെൺ കടുവ കുഞ്ഞുങ്ങൾക്ക് ജന്മം നൽകിയതെന്ന് ഉദ്യോഗസ്ഥർ പറഞ്ഞു. കൂടാതെ പെൺ കടുവയും എല്ലാ കുഞ്ഞുങ്ങളും ആരോഗ്യത്തോടെ ഇരിക്കുന്നുവെന്ന് ഉദ്യോഗസ്ഥർ അറിയിച്ചു.
അദിതിയെയും കുഞ്ഞുങ്ങളെയും സിസിടിവി ക്യാമറകൾ വഴി 24 മണിക്കൂറും സൂക്ഷ്മമായി നിരീക്ഷിക്കുന്നുണ്ടെന്ന് ദൽഹി മൃഗശാല ഡയറക്ടർ സഞ്ജിത് കുമാർ പറഞ്ഞു. ജനിച്ചതിന് ശേഷമുള്ള ആദ്യത്തെ 48 മണിക്കൂർ വളരെ നിർണായകമാണെന്നും അതിനാൽ മൃഗശാല സംഘം വളരെ ജാഗ്രത പാലിക്കുന്നുണ്ടെന്നും അദ്ദേഹം പറഞ്ഞു.
അമ്മ കടുവ തന്റെ കുഞ്ഞുങ്ങളെ നന്നായി പരിപാലിക്കുന്നുണ്ടെന്നും കുമാർ പറഞ്ഞു. ഇതിനു പുറമെ കുഞ്ഞുങ്ങളെ നന്നായി പരിപാലിക്കുന്നതിനായി കടുവയ്‌ക്ക് സുരക്ഷിതവും സമാധാനപരവുമായ അന്തരീക്ഷം നൽകിയിട്ടുണ്ടെന്ന് മൃഗശാല അധികൃതർ പറഞ്ഞു.
ഈ പുതിയ കുടുംബത്തിന്റെ വരവ് ദൽഹി മൃഗശാലയിലെ വിനോദസഞ്ചാരികൾക്ക് മറ്റൊരു ആകർഷണം കൂടിയായി. നാഗ്പൂരിലെ ഗോരേവാഡ റെസ്ക്യൂ സെന്ററിൽ നിന്നാണ് അദിതിയെ ദൽഹിയിലേക്ക് കൊണ്ടുവന്നത്.
