കോഴിക്കോട് : ലഹരി പരിശോധനക്കിടെ പൊലീസുകാരനെ ആക്രമിച്ചതിന് പിടിയിലായ പി കെ ബുജൈറിനെ കുന്ദമംഗലം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് റിമാന്‍ഡ് ചെയ്തു. മജിസ്‌ട്രേറ്റിന്റെ വസതിയില്‍ ഹാജരാക്കിയ പി കെ ബുജൈറിനെ രണ്ടാഴ്ചത്തേക്കാണ് റിമാന്‍ഡ് ചെയ്തത്.
മെഡിക്കല്‍ പരിശോധനയ്‌ക്ക് ശേഷം കുന്ദമംഗലം പൊലീസ് പ്രതിയെ ഞായറാഴ്ച ഉച്ചയ്‌ക്കാണ് മജിസ്‌ട്രേറ്റിന്റെ വസതിയില്‍ ഹാജരാക്കിയത്.യൂത്ത് ലീഗ് ജനറല്‍ സെക്രട്ടറി പി.കെ. ഫിറോസിന്റെ സഹോദരനാണ് പി കെ ബുജൈര്‍.അതേസമയം, സഹോദരന്റെ അറസ്റ്റുമായി ബന്ധപ്പെട്ട കേസില്‍ ഇടപെടില്ലെന്നും തെറ്റ് ചെയ്താല്‍ ശിക്ഷിക്കപ്പെടണമെന്നും പി.കെ. ഫിറോസ് പറഞ്ഞു. പൊലീസ് നടത്തുന്ന അന്വേഷണം സ്വാഗതം ചെയ്യുന്നുവെന്നും അദ്ദേഹം പ്രതികരിച്ചു.
ലഹരി ഇടപാട് നടത്തുന്നുന്നെന്ന വിവരത്തെ തുടര്‍ന്ന് നടന്ന പരിശോധനയ്‌ക്കിടെയാണ് പി.കെ ബുജൈര്‍ പിടിയിലായത്. ഇന്നലെ വൈകിട്ട് ഏഴ് മണിയോടെ കുന്ദമംഗലത്തിന് സമീപമാണ് ആക്രമണമുണ്ടായത്. വാഹനം പരിശോധിക്കാന്‍ ശ്രമിക്കുന്നതിനിടെ ബുജൈര്‍ പ്രകോപിതനായി പൊലീസുകാരന്റെ മുഖത്തടിക്കുകയായിരുന്നു.ആക്രമണത്തില്‍ കുന്ദമംഗലം പൊലീസ് സ്റ്റേഷനിലെ സിപിഒ ശ്രീജിത്തിന് പരിക്കേറ്റു. എന്നാല്‍ പികെ ബുജൈറില്‍ നിന്ന് ലഹരി വസ്തുക്കള്‍ കണ്ടെത്തിയിട്ടില്ല.ലഹരി വസ്തു പൊതിയാന്‍ ഉപയോഗിക്കുന്ന കവര്‍ ആണ് കണ്ടെത്തിയത്.
