തൃശൂര്:മനുഷ്യാവകാശ, പരിസ്ഥിതി പ്രവര്ത്തകനും ചിന്തകനുമായ വി.ബി. അജയകുമാര് (48) തിരുവനന്തപുരത്ത് അന്തരിച്ചു. ഞായറാഴ്ച പുലര്ച്ചെ സ്വകാര്യ ആശുപത്രിയിലായിരുന്നു അന്ത്യം.
മൃതദേഹം കൊടുങ്ങല്ലൂരിലെ വസതിയില് പൊതുദര്ശനത്തിന് വച്ചിരിക്കുകയാണ്.വൈകിട്ട് അഞ്ചിന് കൊടുങ്ങല്ലൂര് ചപ്പാറ ശ്മശാനത്തിലാണ് സംസ്കാരം. ദളിത് -ആദിവാസി പ്രശ്നങ്ങളില് സജീവമായി ഇടപെട്ടിരുന്നു.
ഇത്തരം വിഷയങ്ങളില് ഇടപെടുന്ന റൈറ്റ്സ് എന്ന സംഘടനയുടെ എക്സിക്യൂട്ടീവ് ചെയര്മാന് ആയിരുന്നു അജയകുമാര്. നര്മദ ബചാവോ ആന്ദോളന്, പീപ്പിള്സ് വാച്ച് തുടങ്ങിയ പ്രസ്ഥാനങ്ങളില് പ്രവര്ത്തിച്ച അജയകുമാര്, നിരവധി യുഎന് സമ്മേളനങ്ങളില് പാര്ശ്വവല്കൃത സമൂഹങ്ങള്ക്കായി പ്രബന്ധങ്ങള് അവതരിപ്പിച്ചു. കാലാവസ്ഥ വ്യതിയാനം ചര്ച്ച ചെയ്ത സിഒപി 26, സിഒപി 28 സമ്മേളനങ്ങളിലും സംബന്ധിച്ചു. 2018ലെ പ്രളയകാലത്ത് ദളിത്-തീരദേശ മേഖലകളിലെ വിദ്യാര്ഥികള്ക്കായി നിരവധി പദ്ധതികള്ക്ക് നേതൃത്വം നല്കി.
