വയനാട് : കനത്ത മഴയെ തുടര്‍ന്ന് വയനാട് മക്കിമല പുഴയില്‍ നീരൊഴുക്ക് അതിശക്തമായി. താഴ്ന്ന പ്രദേശങ്ങളില്‍ വെള്ളം കയറി.ചെളി കലങ്ങിയ വെള്ളം പുഴയില്‍ കുത്തിയൊഴുകുന്നു. മണ്ണിടിച്ചില്‍ ഉണ്ടായോ എന്ന് പരിശോധിക്കുന്നു. പ്രദേശവാസികള്‍ ജാഗ്രത പാലിക്കണമെന്ന് അധികൃതര്‍ മുന്നറിയിപ്പ് നല്‍കി.
ജില്ലയില്‍ ശനിയാഴ്ച ഇടവേളയില്ലാതെ പരക്കെ മഴ പെയ്തു.കഴിഞ്ഞ രാത്രി മുതല്‍ തുടങ്ങിയ മഴയാണ് തുടര്‍ന്നത്. ഈ സാഹചര്യത്തില്‍ മാനന്തവാടി, വൈത്തിരി താലൂക്കുകളിലെ 9 പഞ്ചായത്തുകളില്‍ റിസോര്‍ട്ടുകളുടെയും ഹോം സ്റ്റേകളുടെയും പ്രവര്‍ത്തനം നിരോധിച്ചു. ചൂരല്‍മല -മുണ്ടക്കൈ പ്രദേശത്തെ നോ ഗോസോണ്‍ മേഖലയിലേക്കുള്ള പ്രവേശനം നിരോധിച്ചു.
തവിഞ്ഞാല്‍ ഗ്രാമപഞ്ചായത്തില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം തുറന്നു. കനത്ത മഴയെ തുടര്‍ന്ന് തോടുകളിലും പുഴകളിലും ജലനിരപ്പ് ഉയര്‍ന്നിട്ടുണ്ട്. തലപ്പുഴയില്‍ പുഴ കരകവിഞ്ഞു. കാപ്പിക്കളത്ത് നാല് വീടുകളിലുള്ളവരെ ബന്ധുവീടുകളിലേക്ക് മാറ്റി.
