തിരുവനന്തപുരം: ജില്ലയില്‍ മുങ്ങിമരണങ്ങളുടെ എണ്ണം കൂടി വരുന്ന സാഹചര്യത്തില്‍ പ്രതിരോധപ്രവര്‍ത്തനങ്ങള്‍ ശക്തമാക്കാനൊരുങ്ങി ജില്ലാ ദുരന്ത നിവാരണ അതോറിറ്റിയും ജില്ലാ ഭരണകൂടവും. ഇതിന്റെ ഭാഗമായി ‘ജീവനം-ജീവനോട് ജാഗ്രതയുടെ യുദ്ധം’ എന്ന പേരില്‍ ക്യാമ്പയിന്‍ ആരംഭിച്ചു.
2019 മുതല്‍ 2025 വരെ കുട്ടികളും വിദേശികളും ഉള്‍പ്പടെ 352 പേര്‍ തിരുവനന്തപുരം ജില്ലയില്‍ മാത്രം മരിച്ചിട്ടുള്ളതായിട്ടാണ് ഫയര്‍ ആന്റ് റെസ്‌ക്യൂ വകുപ്പ് നല്‍കുന്ന കണക്ക്. ഇതില്‍ 315 പുരുഷന്മാരും 37 സ്ത്രീകളുമാണ്. ഇതിന്റെ ഭാഗമായി ഫയര്‍ ആന്‍ഡ് റെസ്‌ക്യൂ, ടൂറിസം, തദ്ദേശ സ്വയംഭരണ വകുപ്പ് തുടങ്ങിയവയുടെ സഹായത്തോടെ മുങ്ങിമരണങ്ങള്‍ കൂടുതലായി റിപ്പോര്‍ട്ട് ചെയ്യപ്പെട്ട ജില്ലയിലെ മേഖലകളെ ദുരന്തനിവാരണ നിയമ പ്രകാരം അപകടമേഖലയായി പ്രഖ്യാപിക്കാന്‍ ജില്ലാ ഭരണകൂടം നടപടികള്‍ സ്വീകരിച്ചിട്ടുണ്ട്. കല്ലാര്‍, കൊല്ലമ്പുഴ, അരുവിപ്പുറം, മങ്കയം, ചെല്ലഞ്ചി, പാലോട്, അരുവിക്കര ഡാം, വട്ടിയൂര്‍ക്കാവ് ആയിരവല്ലി തമ്പുരാന്‍ ക്ഷേത്രക്കടവ്, നെയ്യാര്‍ ജലാശയം, മൂന്നാറ്റുമുക്ക്, ആനന്ദേശ്വരം, പൂവന്‍പാറ, കുണ്ടമണ്‍കടവ്, കൂവക്കുടി പാലം, അരുവിപ്പുറം, പൊഴിക്കര എന്നീ 16 കടവുകളാണ് അപകടമേഖലകളായി തിരിച്ചിരിക്കുന്നത്.
