തിരുവനന്തപുരം: കേരള സര്‍വകലാശാലയില്‍ രജിസ്ട്രാര്‍ പദവിയില്‍ നിന്ന് സസ്‌പെന്‍ഡ് ചെയ്തിട്ടും വഴങ്ങാതെ ഇടത് സിന്‍ഡിക്കേറ്റിന്റെ പിന്തുണയോടെ വെല്ലുവിളിക്കുന്ന ഡോ കെ.എസ്. അനില്‍കുമാറിനെതിരെ കടുത്ത നടപടയുമായി വി സി ഡോ മോഹന്‍ കുന്നുമ്മല്‍. ഡോ കെ.എസ്. അനില്‍കുമാറിന്റെ ശമ്പളം തടയാന്‍ ഫൈനാന്‍സ് ഓഫീസര്‍ക്ക് വി സി നിര്‍ദേശം നല്‍കി.
നേരത്തെ രജിസ്ട്രാറിന്റെ ഓഫീസ് അടയ്‌ക്കാനും കാര്‍ ഗാരേജില്‍ ഇടാനും വിസി ഉത്തരവിട്ടെങ്കിലും നടപ്പായിരുന്നില്ല. ഇടത് സിന്‍ഡിക്കേറ്റംഗങ്ങള്‍ വി സിയുടെ നടപടി അംഗീകരിച്ചില്ല.
സെനറ്റ് ഹാളില്‍ ശ്രീപത്മനാഭ സേവാ സമിതി നടത്തിയ പരിപാടിയില്‍ ഭാരതാംബ ചിത്രം വച്ചതിനെ എസ് എഫ് ഐ പ്രവര്‍ത്തകര്‍ എതിര്‍ക്കുകയും ഇതിന് അനുകൂലമായി രജിസ്ട്രാര്‍ നിലപാട് സ്വീകരിച്ചതുമാണ് പ്രശ്‌നങ്ങളുടെ തുടക്കം.ഗവര്‍ണര്‍ പങ്കെടുത്ത പരിപാടിയുടെ അനുമതി രജിസ്ട്രാര്‍ റദ്ദാക്കിയതിനെ തുടര്‍ന്ന് ഗവര്‍ണറോട് അനാദരവ് കാട്ടിയതിന് വി സി രജിസ്ട്രാറെ സസ്പന്‍ഡ് ചെയ്യുകയായിരുന്നു.
കഴിഞ്ഞ ജൂലൈ രണ്ടിനാണ് വിസി രജിസ്ട്രാറെ സര്‍വീസില്‍ നിന്നും സസ്‌പെന്‍ഡ് ചെയ്തത്. എന്നാല്‍ ജൂലായ് ആറിന് സിന്‍ഡിക്കേറ്റ് അംഗങ്ങള്‍ അനില്‍കുമാറിന്റെ സസ്‌പെന്‍ഷന്‍ പിന്‍വലിക്കുകയും രജിസ്ട്രാറുടെ ചുമതല വീണ്ടും ഏറ്റെടുത്തതായി സര്‍വകലാശാല ഉത്തരവ് ഇറക്കുകയായിരുന്നു.
