ന്യൂദല്‍ഹി: കോണ്‍ഗ്രസിന് സംഭാവനയായി ലഭിച്ച 199 കോടി രൂപയ്ക്ക് നികുതി ഇളവ് നല്‍കാനാവില്ലെന്നും ഈ വരുമാനത്തിന് നികുതി അടച്ചേ മതിയാവൂ എന്നും ഇന്‍കം ടാക്സ് ട്രിബ്യൂണല്‍. 2017-18ല്‍ സംഭാവനയിനത്തില്‍ ലഭിച്ച വരുമാനത്തിന്മേല്‍ നികുതി ഒഴിവാക്കിത്തരണമെന്ന കോണ്‍ഗ്രസിന്റെ അപേക്ഷയാണ് ഇന്‍കം ടാക്സ് ട്രിബ്യൂണല്‍ തള്ളിയത്.
സംഭാവനയായതിനാലാണ് ഈ തുകയ്‌ക്ക് നികുതി ഒഴിവാക്കണമെന്ന് കോണ്‍ഗ്രസ് ആവശ്യപ്പെട്ടിരുന്നതെങ്കിലും അനുവദിച്ച സമയത്തിനകത്ത് കോണ്‍ഗ്രസ് നികുതി റിട്ടേണ്‍ നല്‍കിയിരുന്നില്ല. സംഭാവനയായാലും വരുമാനത്തിന് പാര്‍ട്ടി നികുതി നല്‍കണമെന്ന ഇന്‍കം ടാക്സ് വകുപ്പിന്റെ നിലപാട് ഇന്‍കം ടാക്സ് ട്രിബ്യൂണല്‍ ഉയര്‍ത്തിപ്പിടിക്കുകയായിരുന്നു.
ഇന്‍കം ടാക്സ് നിയമത്തിലെ 13 എ പ്രകാരം സംഭാവനയായി ലഭിച്ച 199 കോടി രൂപയ്ക്ക് നികുതിയിളവ് നല്‍കണമെന്ന് കാണിച്ച് 2019 ജൂലായ് 2നാണ് കോണ്‍ഗ്രസ് നികുതി റിട്ടേണ്‍ സമര്‍പ്പിച്ചത്. പക്ഷെ 2018 ഡിസംബര്‍ 31 ആയിരുന്നു നികുതി റിട്ടേണ്‍ സമര്‍പ്പിക്കുന്നതിനുള്ള അവസാന തീയതി. കോണ്‍ഗ്രസിന് ലഭിച്ച ഒരു സംഭാവന 14.49 ലക്ഷം രൂപയായിരുന്നു. ഒരാളില്‍ നിന്നും നിയമപരമായി സ്വീകരിക്കാവുന്ന പരമാവധി സംഭാവന 2000 രൂപ മാത്രമാണെന്നിരിക്കെയാണ് ഇത്രയും വലിയ തുക ഒരാളില്‍ നിന്നും സംഭാവനയായി സ്വീകരിച്ചിരിക്കുന്നത്. മാത്രമല്ല, 2017 ധനകാര്യ നിയമപ്രകാരം സംഭാവനകള്‍ ബാങ്ക് അക്കൗണ്ട് വഴി മാത്രമേ സ്വീകരിക്കാവൂ എന്ന് ചട്ടമുണ്ട്. എന്നാല്‍ ഈ ചട്ടം ലംഘിച്ചാണ് കോണ്‍ഗ്രസ് വലിയ തുക സംഭാവനയായി സ്വീകരിച്ചത്.
